قوباد تاڵه‌بانی: به‌هه‌وڵی سه‌رۆكی یه‌كێتی نزیكین له‌چاره‌سه‌ری كێشه‌كانمان له‌گه‌ڵ به‌غدا

تایبەت

دیمەنێکى پانێڵەکە

ئەمڕۆ پێنجشەممە 28ى8ى2025 پانێڵى یەکەم لە رۆژى دووەمى كۆنگرەی هاوپەیمانیی سۆشیال دیموكرات لە جیهانی عەرەبی، بەبەشدارى قوباد تاڵەبانى بەڕێوەچوو.

لە پانێڵەکەدا قوباد تاڵەبانى جێگری سەرۆکوەزیرانى هەرێمى کوردستان، رایگەیاند: لە عیراقدا چوارچێوەیەكی دەستووریی بۆ مافەكانمان هەیە، بەڵام كێشە لەبەردەم مافەكانمان ماوە و هێشتا كورد تەواوی مافە دەستورییەكانی لە عیراق وەرنەگرتووە، هاوکات دەبێت کێشەکان بە دیالۆگ  و گەڕانەوە بۆ دەستور چارەسەر بكرێت.

ئاماژەیبەوەشدا: حكومەتی عیراق، حكومەتێكی فیدراڵیە و كوردیش هاوبەشێكی راستەقینەیە و کێشەکانى نێوان بەغدا و هەرێم بە گفتوگۆ چارەسەردەکرێت.

ئەوەشیخستەڕوو: یەكێتیی نیشتمانیى کوردستان و سەرۆك بافڵ تاڵەبانی لە چارەسەركردنی كێشەكانی نێوان هەرێم و بەغدا نزیكیان كردوینەتەوە و كورد نوێنەرایەتی دۆزێكی رەوا دەكات و نابێت موچە چەكی سزادان بێت، هاوکات پرسى کورد تەنها دابینکردنى مووچە نییە.

باسی لەوەشکرد: كێشەی كورد لە وڵاتانی دیکە چارەسەر نەكرێت، كێشەی خودی ئەو وڵاتانەش چارەسەر ناكرێت و هەر پارچەیەكی كوردستان تایبەتمەندی و داواكاری جیاوازییان هەیە.

ئەوەشى روونکردەوە: پشتیوانی پڕۆسەی چارەسەری لە توركیا دەکەین و دەبێت کورد لە داهاتووى سووریادا بەشێکى سەرەکى بێت. 

قوباد تاڵەبانى جێگری سەرۆکوەزیرانى هەرێمى کوردستان راشیگەیاند: بۆ جیهانمان سەلماندووە کورد داواى چارەسەرى کێشەکان دەکات و لە رابردوودا دۆسییەى کورد وەک هەڕەشەیەک سەیرکراوە، بەڵام هەموو تێگەیشتن کە کورد هیچ کات هەڕەشە نەبووە.

دوێنێ 27ی8ی2025 لە سلێمانی، كۆنگرەی هاوپەیمانیی سۆشیال دیموكرات لە جیهانی عەرەبی دەستپێكرد و رۆژی یەكەمی كۆنگرەكەش پەیوەستبوو بە ژنانەوە و كۆنگرەكە ماوەی چوار رۆژ دەخایەنێت.

ناوەڕۆكی كۆنگرەی  هاوپەیمانیی سۆشیال دیموكرات لە جیهانی عەرەبی، بریتییە لە(پرسەكانی ئاشتی، ئاسایش، پرسە هەنووكەییەكانی جیهانیی عەرەبی)، تێیدا ژمارەیەكی زۆر لە كەسایەتی و سەركردە جیهانییەكان، لە جیهانیی عەرەبی و عیراق و كوردستانەوە بەشداریی دەكەن، لەو چوارچێوەیەشدا بڕیارە ئەمڕۆ د. لەتیف جەمال رەشید سەرۆككۆماری عیراقیش وتار پێشكەش بكات.

PUKMEDIA