بەبەشداری سەرۆككۆمار و سەرۆك بافڵ كۆنگرەی هاوپەیمانیی سۆشیال دیموكرات لە جیهانی عەرەبی دەستیپێكرد

میدیاکان

دیمەنێکى کۆنگرەکە

كۆنگرەی هاوپەیمانیی سۆشیال دیموكرات لە جیهانی عەرەبی، بۆ رۆژی دووەم دەستیپێكرد و بافڵ جەلال تاڵەبانی، سەرۆكی یەكێتیی نیشتمانیی كوردستان، وتارێكی پێشكەشكرد و رایگەیاند: رۆژهەڵاتی ناوەڕاست رووبەڕووی چەندین ئاڵنگاری بووەتەوە، بەڵام گەنجان هیوایان بە ئاشتییە و دەبێت پێكەوە كار بۆ هێنانەكایەی بكەین، ئاماژەی بەوەشكرد: سلێمانی ئەو شوێنەیە هەمیشە بە ئازادانە بیروڕای تێدا گۆڕاوەتەوە و شاری دیموكراسییە.

دەرباز كۆسرەت رەسوڵ: سلێمانی پێگەیەكی سیاسی گرنگی هەیە

ئەمڕۆ 28ی 8ی 2025، كۆنگرەی هاوپەیمانیی سۆشیال دیموكرات لە جیهانی عەرەبی  بە ساتێك وەستان بۆ گیانی پاكی شەهیدان دەستیپێكرد و دەرباز كۆسرەت رەسوڵ، ئەندامی مەكتەبی سیاسی یەكێتی، وێڕای بەخێرهێنانی سەركردەی پارتە سیاسییەكان و ئامادەبووان، وتارێكی پێشكەش كرد و رایگەیاند: ئەمڕۆ سلێمانی و هەرێمی كوردستان باوەشیان بۆ روداوێكی مێژوویی گەورە و گرنگ كردووەتەوە و سلێمانی پێگەیەكی سیاسی گرنگی هەیە و  ئەنجامدانی ئەم كۆنگرانەش نیشانەی زیندوویی سلێمانییە و بە خۆشحاڵییەوە یەكێتیی نیشتمانیی كوردستان سەرمەشقی ئەو دەستكەوتەیە.

راشیگەیاند:پشتگیری لە هەموو پڕۆسەیەكی ئاشتی دەكەین و سەركەوتنی پڕۆسەی دیموكراسی دەستكەوتە، بۆیە كار بۆ بەدیهێنانی حكومڕانییەكی باش دەكەین و بەیەكەوە دەتوانین داهاتووی كۆمەڵگەكەمان سەقامگیر بكەین.

سەرۆككۆمار: سەرۆك مام جەلال كێشەكانی كوردی بە جیهان ناساند 

هەر لە كۆنگرەكەدا د. لەتیف جەمال رەشید، سەرۆككۆماری عیراق، وتارێكی پێشكەش كرد و رایگەیاند: سەرۆك مام جەلال كێشەكانی كوردی بە جیهان ناساند و پێویستە هاوسەنگی لە نێوان وڵاتاندا بمێنێتەوە و كێشەكان چارەسەر بكرێن.

ئاماژەی بەوەشكرد: پێكەوە ژیان مافی ئاشتیانەیە بۆ هەمووان و عیراق و گەلەكەی هاوسۆزی گەلی فەلەستینە.

سەرۆككۆماری عیراق ئەوەشی راگەیاند: لە وڵاتانی پێشكەتوو دیموكراسی چووەتە خزمەتی دەوڵەمەندەكانەوە و  وڵاتە گەورەكانیش مافی مرۆڤ پێشێلدەكەن.

سەرۆك بافڵ: سلێمانی شاری دیموكراسییە

هەر لە كۆنگرەی هاوپەیمانیی سۆشیال دیموكرات لە جیهانی عەرەبی، بافڵ جەلال تاڵەبانی، سەرۆكی یەكێتیی نیشتمانیی كوردستان، وتارێكی پێشكەشكرد و   سلێمانی ئەو شوێنەیە هەمیشە بە ئازادانە بیروڕای تێدا گۆڕاوەتەوە و شاری دیموكراسییە.

راشیگەیاند: رۆژهەڵاتی ناوەڕاست رووبەڕووی چەندین ئاڵنگاری بووەتەوە، بەڵام گەنجان هیوایان بە ئاشتییە و خراپ بەكارهێنانی دەسەڵاتیش مەترسییە، بۆیە دەبێت پێكەوە بۆ هێنانەكایەی ئاشتی کاربكەین و ژنانیش پێشەنگی ئەو بوارەن.


دوێنێ 27ی8ی2025 لە سلێمانی، كۆنگرەی هاوپەیمانیی سۆشیال دیموكرات لە جیهانی عەرەبی دەستپێكرد و رۆژی یەكەمی كۆنگرەكەش پەیوەستبوو بە ژنانەوە و كۆنگرەكە ماوەی چوار رۆژ دەخایەنێت.

ناوەڕۆكی كۆنگرەی  هاوپەیمانیی سۆشیال دیموكرات لە جیهانی عەرەبی، بریتییە لە(پرسەكانی ئاشتی، ئاسایش، پرسە هەنووكەییەكانی جیهانیی عەرەبی)، تێیدا ژمارەیەكی زۆر لە كەسایەتی و سەركردە جیهانییەكان، لە جیهانیی عەرەبی و عیراق و كوردستانەوە بەشداریی دەكەن، لەو چوارچێوەیەشدا بڕیارە ئەمڕۆ د. لەتیف جەمال رەشید سەرۆككۆماری عیراقیش وتار پێشكەش بكات.



PUKMEDIA