حکومەتی هەرێم: ئەو بڕە نەوتەی ئامادەیە لە رێی سۆمۆوە هەناردەی دەکەین

راگەیاندنی حکومەتی هەرێم

کۆبوونەوەی حکومەتی هەرێمی کوردستان

ئەنجومەنی وەزیرانی هەرێمی کوردستان لە کۆبوونەوەی ئەمڕۆیدا چەند بڕیارێکی دەرکرد و تێیدا حکومەتی هەرێمی کوردستان  ئەو بڕە نەوتەی کە هەیە لەرێی کۆمپانیای سۆمۆوە هەناردەی دەکات، داواش لە حکومەتی فیدڕاڵی دەکات مووچەی مانگی حوزەیران و دواتریش مانگی تەمموز خەرج بکات.

بەپێی راگەیەندراوی کۆبوونەوەی حکومەتی هەرێمی کوردستان، بڕگەی یەکەمی کۆبوونەوەکە، تاوتوێکردنی دوا هەنگاوەکانی خەرجکردنی مووچەی مانگی حوزەیران و تەمموزی 2025 بوو لەبەر ڕۆشنایی بڕیاری هاوبەشی هەردوو ئەنجومەنی وەزیرانی فیدراڵ و هەرێمی کوردستان.

لە راگەیەندراوەکەدا ئاماژە بەوەشکراوە، کەوەزیری دارایی و ئابووری رایگەیاندووە لیستی مووچە و تەرازووی پێداچوونەوەی مانگی حوزەیران، ڕەوانەی وەزارەتی دارایی فيدراڵ کراوە و ئەرکی وەزارەتی دارایی عیراقە  مووچەی مانگی حوزەیرانی مووچەخۆرانی هەرێم خەرج بکات.

پەیوەست بە بەردەوامی گفتوگۆکان، ئەنجومەنی وەزیران نوێنەرانی هەرێمی کوردستانيی لە لیژنەی هاوبەش لەگەڵ حکومەتی فیدڕاڵ ڕاسپارد کە گفتوگۆ لەگەڵ هاوتاکانیان لە لیژنەکە بکەن، تا وەکوو لە نزیکترین دەرفەتدا، دۆسیەی داهاتی نانەوتی یەکلایی ببێتەوە بە گوێرەی ئەو ڕێکارە هاوبەشەی لە بڕیاری هەردوو ئەنجومەنی وەزیرانی هەرێم و فیدڕاڵدا هاتووە.

راشیگەیاندووە، حکومەتی هەرێمی کوردستان بەرپرسیارێتی قەرەبووکردنەوەی کۆمپانیای نەوتی بەرهەمهێنەری ئەو بڕە نەوتە دەگرێتە ئەستۆ کە بە گوێرەی بڕیاری هاوبەشی ئەنجومەنی وەزیرانی فیدراڵ و هەرێم بۆ مەبەستەکانی بەکارهێنانی ناوخۆ لە هەرێم، تەرخان کراوە.

لەسەر پرسی هەناردە کردنەوەی نەوتیش، حکومەتی هەرێم رایگەیاندووە:ئەو بڕە نەوتەی ئێستا ئامادەیە بۆ هەناردە و لە لایەن کۆمپانیا بیانییەکان بەرهەم دەهێنرێت، ڕادەستی کۆمپانیای بە بازاڕکردنی نەوت (سۆمۆ) دەکرێت بەمەبەستی هەناردەکردنی لە ڕێگای بەندەری جەیهانەوە.

لە کۆتایشدا،دووپاتی دەکاتەوە، کە حکومەتی هەرێمی کوردستان بەردەوامە لەسەر پابەندبوون بە لەیەکتێگەیشتنی هاوبەشی نێوان هەردوولا، لەم چوارچێوەیەشدا دەبێت حکومەتی فیدڕاڵ مووچەی مانگی حوزەیران و دواتریش مانگی تەمموز خەرج بکات هاوشێوەی مووچەخۆرانی ناوچەکانی دیکەی عیراق.


PUKMEDIA