د.ئەحمەد فاتیح: كوردەكان بەگەڕانەوەیان كوردستانیبوونی كەركوك دەسەلمێنن

PUKMEDIA

د.ئەحمەد فاتیح ئەندامی ئەنجومەنی پارێزگای كەركوك

ئەندامانی فراكسیۆنی یەكێتی لە ئەنجومەنی پارێزگای كەركوك كارلەسەر هاندانی كوردەكان دەكەن بۆ گەڕانەوەیان بۆ زێدی خۆیان لەپڕۆسەی سەرژمێری و ئەندامێكی ئەنجومەنەكەش رایگەیاند: "بۆ سەلماندنی كوردستانیبوونی كەركوك و ناوچە كوردستانییەكان گەڕانەوەی كوردەكان بۆ زێدی خۆیان و خۆتۆماركردن لەسەرژمێریدا گرنگە".

د.ئەحمەد فاتیح ئەندامی ئەنجومەنی پارێزگای كەركوك لە فراكسیۆنی یەكێتی بەوێبسایتی رەسمیی یەكێتیی نیشتمانیی كوردستان PUKMEDIA ی راگەیاند: "گەڕانەوەی كوردەكان بۆ ناوچەكانی خۆیان لەوادەی بەڕێوەچوونی پڕۆسەی سەرژمێری زۆر گرنگە، بۆ سەلماندنی كوردستانیبوونی كەركوك و ناوچە كوردستانییەكان".

"ئێمە وەك ئەندامانی ئەنجومەن و لەمەڵبەندی كەركوكیش بانگەوازمان كردووەو خەڵكمان هانداوە لەڕۆژانی ئەنجامدانی سەرژمێریدا بگەڕێنەوە زێدی خۆیان لەكەركوك و ناوچە كوردستانییەكانی دەرەوەی ئیدارەی هەرێم و بەردەوام كار لەسەر هاندانی كوردەكان دەكەین"، د، ئەحمەد فاتیح وای وت.

بڕیارە رۆژی 20 ی 11ی 2024، سەرژمێریی گشتی لە عیراق و هەرێمی كوردستان ئەنجام بدرێت، بۆ ئەو مەبەستەش 120 هەزار سەرژمێركار لەعیراق و هەرێمی كوردستان بەشدار دەبن لە سەرژمێریی گشتیی دانیشتووان و وەڵامی زیاتر لە 70 پرسیار لەو خێزانانە وەردەگرن كەسەردانیان دەكەن.  

PUKMEDIA