مه‌كته‌بی سیاسی: بەبێ به‌شداری یه‌كێتی هیچ پڕ‌ۆسه‌یه‌ك سه‌رناگرێت

PUKMEDIA

ساڵیادی یەکێتیی نیشتمانیی کوردستان

مه‌كته‌بی سیاسی یه‌كێتیی نیشتمانیی كوردستان بۆ یادی 48 ساڵه‌ی دامه‌زراندن و 47 ساڵه‌ی هه‌ڵگیرسانی شۆڕ‌شی نوێ په‌یامێك بڵاوده‌كاته‌وه‌و ئاماژه‌ بۆ ئه‌وه‌ده‌كات:" با یادی یه‌كێتی بكه‌ینه‌ ده‌رفه‌ت بۆ رێزلێنان له‌ تێكۆشانی هه‌ڤاڵانی دێرین و جۆشدانی به‌شداریی فراوانتری كچ و كوڕ‌انی دوا رۆژ  كه‌ داهاتوو بۆ ئه‌وان و هه‌ر به‌وانیش ره‌نگرێژ ده‌كرێت، چونكه‌ ره‌وتی رووداوه‌كان بۆ هه‌موانی ده‌رخست هێشتاش ئه‌ركه‌ قورسه‌كانی خزمه‌تكردنی كۆمه‌ڵانی خه‌ڵك له‌ كوردستان و له‌عیراقیشدا، هه‌ر به‌ یه‌كێتی ده‌كرێت چونكه‌ (یه‌كێتی بازووی پته‌وی تێكۆشانه‌ بۆ داهاتووی كوردستان".

ده‌قی په‌یامه‌كه‌ی مه‌كته‌بی سیاسی...

-كۆمه‌ڵانی خه‌ڵكی كوردستان

-كه‌سوكاری سه‌ربه‌رزی شه‌هیدانی شۆڕ‌شی نوێ و كاروانی بێ بڕ‌انه‌وه‌ی قوربانیدانی گه‌له‌كه‌مان .

-هه‌ڤاڵانی تێكۆشه‌ری ریزه‌كانی یه‌كێتیی نیشتمانیی كوردستان 

یادی (48)ساڵه‌ی دامه‌زراندنی یه‌كێیتییه‌كه‌تان و (47)ساڵه‌ی به‌رپابوونی شۆڕ‌شی نوێتان لێ پیرۆزبێت. جه‌ژنی دامه‌زاندن و به‌رپابوونتان به‌ خۆشی و شادی تێپه‌ڕێت.

یه‌كێتیی نیشتمانیی كوردستان له‌ هه‌لومه‌رجی دوای هه‌ره‌سدا دڕ‌ی به‌ شه‌وه‌زه‌نگی تاریكی دا و خۆری ئومێدی به‌ گه‌له‌كه‌مان به‌خشییه‌وه‌. هه‌زاران شه‌هیدی له‌م هه‌وراز و نشێوه‌دا به‌خشی، سه‌ره‌ڕ‌ای دژواری رێگا، سه‌ره‌ڕ‌ای ئه‌نفال و كیمیاباران، راگوێزان و ته‌عریب كۆڵی نه‌دا و بۆ یه‌كه‌مین جار له‌ مێژووی حزبی كوردیدا خه‌باتی گه‌یانده‌ لووتكه‌ی راپه‌رینی رزگاری، گه‌یاندییه‌ یه‌كه‌مین هه‌ڵبژاردن و پێكهێنانی حوكمرانی ئیراده‌ و ئیداره‌ی گه‌له‌كه‌مان و ئه‌زموونێكی بیناكرد كه‌ ببێته‌ ناوه‌ندێك بۆ خه‌ونی كوردستانیی و چه‌قی روخاندنی رژێمی دیكتاتۆری به‌عس له‌ (٢٠٠٣)دا  به‌ رزگاری سه‌رتاسه‌ری كوردستانیشه‌وه‌.

ئه‌م خه‌باته‌ درێژخایانه‌ی یه‌كێتی به‌ یه‌كڕ‌یزی و یه‌ك ئامانجی له‌گه‌ڵ هێزه‌ كوردستانی و عیراقییه‌كان كارێكی كرد ده‌ستووری عیراقی نوێ شه‌رعیه‌تی ئه‌زموونی دیموكراتی كوردستان بسه‌لمێنێت، رابه‌ری شۆڕ‌شی نوێش، سه‌رۆك مام جه‌لال،  ببێته‌ یه‌كه‌م سه‌رۆك كۆماری هه‌ڵبژێردراوی كورد له‌ مێژووی عیراقدا.

ئه‌م ویسته‌ خه‌باتگێڕ‌ییه‌ی یه‌كێتی و كوردایه‌تی بناغه‌ی پته‌وی نه‌خشه‌ڕ‌ێی ده‌ستووری بۆ ناوچه‌ دابڕ‌اوه‌كان، بۆ ته‌وافوق و هاوسه‌نگی له‌ وڵاتی فیدراڵی دانا به‌ جۆرێك سه‌ره‌ڕ‌ای پاشه‌كه‌شێی چه‌ند ساڵی رابردوو و هه‌وڵی گه‌مارۆی سیاسی له‌سه‌ر ئه‌زموونه‌كه‌مان، سه‌ره‌ڕ‌ای هه‌وڵی تێكدانی پره‌نسیبی ته‌وافوق و شه‌راكه‌ت، هێشتا رۆڵی یه‌كێتی له‌پڕ‌ۆسه‌ی سیاسیی وڵات و ناوه‌ندی بڕ‌یار له‌ به‌غدا ، رۆڵێكی گه‌وره‌ و سه‌نگینه‌ به‌ شایه‌تی یار و نه‌یار، هێشتا بێ به‌شداری كارا و راوێژی یه‌كێتی هیچ پڕ‌ۆسه‌یه‌ك له‌ عیراق و له‌كوردستانیش سه‌ر ناگرێت.

بێگومان ئه‌و رۆڵه‌ سه‌نگینه‌ هه‌میشه‌ بۆ قازانج و یه‌كڕ‌یزی گه‌لی كوردستانه‌و ویستێكی نه‌ته‌وه‌یی و روانینێكی كوردستانی له‌ پشته‌.

جه‌ماوه‌ری به‌شه‌ره‌فی گه‌له‌كه‌مان 

یه‌كێتی له‌ رووی رێكخراوه‌ییه‌وه‌ ئه‌زموونێكی چۆنایه‌تی  تێكۆشانی رێكخراوه‌یی و له‌ رووی رێوشوێنه‌كانی خه‌باتی پێشمه‌رگایه‌تی و نه‌به‌ردی و چالاكیشه‌وه‌ شۆڕ‌شێكی ناوازه‌ بوو بۆ وڵاته‌كه‌مان. له‌م ره‌وته‌ ٤٨ ساڵییه‌شدا به‌ شانازییه‌وه‌ ده‌سكه‌وته‌كانی گه‌له‌گه‌مان له‌نزیكی پێنج ده‌یه‌و له‌سی و دوو ساڵه‌ی حوكمڕ‌انی كوردستاندا پێشڕ‌ه‌وایه‌تی و جێپه‌نجه‌ی دیاری یه‌كێتی  پێوه‌یه‌. یه‌كێتییه‌كه‌ی رابه‌رمان سه‌رۆك مام جه‌لال له‌م ئاسته‌دا سه‌ربه‌رزی لای مه‌زاری شه‌هیدانه‌.

كۆمه‌ڵانی خه‌ڵكی كوردستان

وه‌ك یه‌كێتی ئه‌ركی زۆرمان جێبه‌جێكردووه‌ و ئه‌ركی زۆرتریشمان له‌پێشه‌ كه‌ ده‌بێت پێكه‌وه‌ رای په‌ڕ‌ێنین و كۆڕ‌ی خه‌باتی بۆ  جۆشبده‌ین. به‌ تایبه‌تی ئه‌مڕ‌ۆ ته‌حه‌دداكانی به‌رده‌م میلله‌ته‌كه‌مان له‌ ته‌نگژه‌ی دیموكراسی و بۆشایی ده‌ستووریدا وا پێویست ده‌كات به‌ هه‌مان نه‌فه‌سی سه‌رۆك مام جه‌لاله‌وه‌ كۆشش بۆ یه‌كڕ‌یزی میلله‌ته‌كه‌مان بكه‌ینه‌وه‌.

یه‌كڕ‌یزییه‌كی راسته‌قینه‌ كه‌ به‌رژه‌وه‌ندییه‌ باڵاكانی دیموكراسی و هه‌ڵبژاردنێكی دادپه‌روه‌ر و پاكژ دامه‌زراوه‌ نیشتمانییه‌كانمان مشتوماڵ بكاته‌وه‌ دوای سێ ده‌یه‌ له‌ حكومرانی و پێگه‌یینی چه‌ندین نه‌وه‌ی تازه‌ له‌ كۆمه‌ڵی كورده‌واریدا. بۆ ئه‌مه‌ش یه‌كێتی به‌ گرنگییه‌وه‌ له‌ پرسی یه‌كڕ‌یزی و هه‌ڵبژاردنی ئازاد و پاك و بێگه‌رد كه‌ نوێنه‌رایه‌تی میلله‌ته‌كه‌مان به‌ نوێنه‌رایه‌تییه‌كی راسته‌قینه‌ی پێكهاته‌كانیشه‌وه‌ ده‌ڕ‌وانێت و كاری بۆ ده‌كات.

بۆیه‌ هه‌ڤاڵان ؛

 له‌پاڵ به‌رزراگرتنی سه‌روه‌ری و نه‌به‌ردییه‌كانمان، زۆر گونجاوتره‌ ‌یادی ئه‌مساڵ بكه‌ینه‌ ده‌رفه‌تێك بۆ ئه‌ركه‌كانی قۆناغی نوێ له‌چاكسازی راسته‌قینه‌، بیكه‌ینه‌ بۆنه‌یه‌ك بۆ خۆڕ‌ێكخستنه‌وه‌و ئاشتكردنه‌وه‌ی جه‌ماوه‌ر كه‌ سه‌رچاوه‌ی هێزی له‌بننه‌هاتووی یه‌كێتین له‌ڕ‌ێی ئامانجه‌ دووره‌كانی (ئاشتی، دیموكراسی، مافی مرۆڤ و چاره‌ی خۆنووسین )دا.

با یادی یه‌كێتی بكه‌ینه‌ جه‌ژنی گه‌ردن ئازادیی و به‌مه‌ش رۆحی شه‌هیده‌كانمان ئاسووده‌ بكه‌ین. بیكه‌ینه‌ ده‌رفه‌ت بۆ رێزلێنان له‌ تێكۆشانی هه‌ڤاڵانی دێرین و جۆشدانی به‌شداریی فراوانتری كچ و كوڕ‌انی دوا رۆژ كه‌ داهاتوو بۆ ئه‌وان و هه‌ر به‌وانیش ره‌نگرێژ ده‌كرێت، چونكه‌ ره‌وتی رووداوه‌كان بۆ هه‌موانی ده‌رخست هێشتاش ئه‌ركه‌ قورسه‌كانی خزمه‌تكردنی كۆمه‌ڵانی خه‌ڵك له‌ كوردستان و له‌عیراقیشدا، هه‌ر به‌ یه‌كێتی ده‌كرێت چونكه‌ (یه‌كێتی بازووی پته‌وی تێكۆشان بۆ داهاتووی كوردستان).

جارێكی تر ئه‌م یاده‌تان پیرۆزبێت.

درود و نه‌وازش بۆ رۆحی پاكی شه‌هیدان 

 سڵاو :
له‌پێشمه‌رگه‌، رێكخستنه‌كان، زیندانیانی دێرین و له‌ پاڵه‌وانه‌ زۆر و زه‌وه‌نده‌كانی شارو لادێی كورده‌واری كه‌ ئه‌م ته‌لاره‌ به‌رزه‌ی تێكۆشانیان ئاواكرد.

مه‌كته‌بی سیاسی یه‌كێتیی نیشتمانیی كوردستان
2023-6-1

PUKMEDIA