هەڵمەتی سەوزترکردنی دەڤەری راپەڕین راگەیەندرا

PUKMEDIA

هەڵمەتی نیشتمانی روواندنی یەک ملیۆن نەمام

هەڵمەتی نیشتمانی روواندنی یەک ملیۆن نەمام لەسەر بڕیار و راسپاردەى بافڵ جەلال تاڵەبانی سەرۆکی یەکێتیی نیشتمانیی کوردستان دەچێتە دەڤەرێکی تری کوردستانەوە، و بۆ ئەو مەبەستەش رۆژی چوارشەممە ١٧/٥/٢٠٢٣، هەڵمەتی نەمام روواندن لەدارستانی پشدەر لەسنوری ئیدارەی راپەڕین و بەئامادەبوونی بەڕێوەبەری ژمارەیەک فەرمانگەی پەیوەندیدار بەڕێوەچوو. 

حسێن حەمە کەریم نوێنەری نووسینگەی سەرۆک بافڵ جەلال تاڵەبانی، بەڕێوەچونی هەڵمەتی نەمام ڕواندنی لەسنوری هۆبەی دارستان و پاوانی پشدەر سەر بەبەڕێوەبەرایەتی دارستان و پاوانی سلێمانی بەهاندەرێک زانی بۆ زیادکردنی رووبەری دارستانی و فەراهەم کردنی سروشت و ژینگەیەکی لەبار تا ببێتە مایەی بوژانەوەی کەرتی گەشتیاری لەناوچەکەدا. 

لای خۆشیەوە خالد ئەحمەد حەکیم بەڕێوەبەری گشتی کشتوکاڵی ڕاپەڕین پێشوازی لەدەستپێشخەرییەکەی سەرۆک بافڵ کرد بۆ سەوزکردنی کوردستان و هەوڵ و هیممەتەکانی سەرۆکی یەکێتی بەرزنرخاند و رایگەیاند سنوری ئیدارەی راپەڕین پێویستی بەگرنگیپێدانە بەتایبەت لەڕووی ژینگە و دارستانەوە.

بەوتەی هاوکار جەلال بەڕێوەبەری دارستان و پاوانی سلێمانی، دەستپێکردنی هەڵمەتەکەی دەڤەری راپەڕین لەدارستانی پشدەرەوە دەبێتە هۆی بوژاندنەوەی زیاتری ئەم دارستانە دێرینەی لەساڵانی حەفتاکانەوە کاری تێدا دەکرێ، بەمەش هەنگاوێکی تر دەنێین بەئاراستەی سودوەرگرتن لەو رووبەرانەی تائێستا سەوزنەکراون لەپێناو خۆگونجاندن لەگەڵ گۆڕانکارییەکانی کەشوهەوا و کەمکردنەوەی گرفتە ژینگەییەکاندا.

PUKMEDIA