"كابینەی نۆ پڕە لە زهنی سیخوڕ و دروستكردنی دیكتاتۆری"

PUKMEDIA

كابینەی نۆ

لوقمان وەردی جێگری سەرۆكی فراكسیۆنی یەكێتیی نیشتمانیی و كاروان گەزنەیی پەرلەمانتار لە پەرلەمانی كوردستان رەخنەی توند لە راگەیەندراوەكەی نووسینگەی مەسرور بارزانی سەرۆكی كابینەی نۆ لە ئەنجومەنی وەزیران دەگرن  و "بە ئاستنزم و دەبڕینی جاهیلانە" ناوی دەبەن.

جێگری سەرۆكی فراكسیۆنی یەكێتی لە وتارێكی كورتدا كە لە بیروڕای PUKMEDIA  بڵاوكراوەتەوە دەڵێت: "ئاستی راگەیەنراوەكەی نووسینگەی سەرۆكی حكومەت هێندە نزمە لەزمانی تەشهیر وجنێوفرۆشی میدیا سێبەرەكانیان دەچێت".

"دەركەوت ئاستی نووسینی مەكتەبی سەرۆكی حكومەتیش لە ئاستی قسەكانی  وتەبێژەكەیەتی كە رەچاوی هیچ عورفێكی دەوڵەتداری و كارگێری و ریزبەندی پلەی وەزیفی ناكات و بەنەفەسێكی هێندە كورت نووسراوە، ئەو راستییە تۆختر دەكاتەوە كە ئاسان نییە لەگەڵ سەرۆكی حكومەت و هاوكارانی وەك یەك تیم كاربكرێت" لوقمان وەردی وادەڵێت.

كابینەی نۆ پڕیەتی لە زهنی سیخوڕیكردن و زەمینە سازی بۆ دیكتاتۆرییەت

 كاروان گەزنەیی پەرلەمانتاری فراكسیۆنی یەكێتیی نیشتمانیی لە پەرلەمانی كوردستانیش لە وتارێكیكدا كە لە بیرۆڕای PUKMEDIA دا بڵاوكراوەتەوە، بەهەمانشێوە راگەیەندراوەكەی نووسینگەی مەسرور بارزانی بە ئاستنزم ناودەبات و ئاشكرایدەكات "مەسروور بارزانی بڕیاردەدات و محەمەد سەعید سەحافیش دەیگەیەنێت"

ئەو پەرلەمانتارەی یەكێتی رایدەگەیەنێت: "كابینەی نۆ كابینەیەكی ئەمنی پارانۆیدە، و پڕیەتی لە زهنی سیخوڕیكردن و تۆقاندن و زەمینە سازی بۆ دیكتاتۆرییەت و خۆسەپاندن و كوشتن و بڕین، ئەم هەموو رووداوی كوشتن و لێدان و ئەتككردنەش، مسۆگەر دەرهاویشتەی زهنییەتی ئیدارەدانی كابینەكەیە".

"ئەم كابینەیە هەر لە ئیدارەدانەوە بگرە تا دەربڕین بە خراپترین شێوە فەشەلی هێناوە، زمانی ئێستای حكومەت و نووسینگەی سەرۆكی حكومەت و وتەبێژەكەی لە هەر كاردانەوەیەك، زمانێكی ئاستنزمی رێزمانی و دەربڕینێكی جاهلیانەی سەردەمی شەڕی ناوخۆییە" كاروان گەزنەیی وادەڵێت.

ئەگەر ئەمە زمانی سەرۆكی حكومەت بێت!

دوێنێ ئێوارە 26/4 مەسرور بارزانی سەرۆكی كابینەی نۆ، بەناوی نووسینگەكەی خۆیەوە راگەیەندرواێكی كە وەك هەمیشە "بەزمانی زبر و قین و تەشهیر" بڵاوكردەوە.

كاروان گەزنەیی دەڵێت: "ئەگەر ئەمە زمانی سەرۆكی حكومەت بێت لە هەڕەمی هەرە سەرەوەی ئیدارەدان، بێشك هیوایەك نامێنێت بۆ گەشەسەندن و بەرەو پێشبردنی وڵات، بە پێچەوانەوە، هەموو چاوەكان لەسەر دوا بزماری تابووتی ئەم جەهالەتە و جەهەننەمە دروستكراوە دەبن".!

"سەرباری نادادی، گەندەڵی، بیرۆكراسییەت، ژێرپێخستنی یاسا، ناشەفافیەت، تاڵانی، و تۆقاندن و سیاسەتی برسیكردن، سەرجەم وەزارەت و فەرمانگە و جومگەكانی حكومڕانی دووچاری شەلەل و داڕمان بوون، وێڕای رێزم بۆ هەر كەسێكی دڵسۆز، بەڵام سەرجەم بەرپرسانی شوێنە ئاماژە بۆكراوەكانیش، تەنها دەوری فەرمانبەر و تێپەڕاندنی رۆتینی رۆژانە دەبینن، نە زیاتر" پەرلەمانتارەكەی كوردستان وا دەڵێت. 

گەزنەیی دەشڵێت: "لەم كابینەیەدا، مەسرور بارزانی بڕیار دەدات و ئومێد سەباح دەینووسێت و رێبەر ئەحمەد جێبەجێی دەكات و جوتیار عادل (محەمەد سەعید سەحاف) دەیگەیەنێت".

مووچە تێكەڵاوی ململانێ‌ سیاسییەكان نەكرێت

سەمیر هەورامی وتەبێژی قوباد تاڵەبانی جێگری سەرۆكوەزیرانی هەرێمی كوردستان بە سایتی رەسمی یەكێتیی نیشتمانیی كوردستان PUKMEDIA ی رایگەیاند: "داوامان كردووە كێشەی موچە لە سلێمانی چارەسەر بكرێت، ئەوجا باسی گەڕانەوەی تیمی یەكێتی بكرێت بۆ حكومەت و پێویستە مووچە تێكەڵاوی ململانێ‌ سیاسییەكان نەكرێت".

"داواكارییەكانی یەكێتی داواكاریی گشتین، كە سەرەكیترینیان پرسی مووچەیە، دەمانەوێت لە هەرێمی كوردستان مووچە بكرێت بە سیادی، ناكرێت لە شارێك دابەش بكرێت و لە شارێكی دیكە دابەش نەكرێت"، سەمیر هەورامی وایوت.

 

PUKMEDIA