چاودێری چڕی نەخۆشخانەكانی هەولێر جێگای توشبوانی كۆرۆنایان تێدا نەماوە

بەڕێوەبەری نەخۆشخانەی لالاڤ لەهەولێر رایدەگەیەنێت: سەرجەم قەرەوێڵەكانی چاودێری چڕ لەنەخۆشخانەكانی هەولێر پڕبوون و نیوەیان ئەو گەنجانەن كە بەقورسی توشی پەتاكە بوون و بەقورسی گرتویانە، دەشڵێت: پ پاسێك مامۆستای گەشتیار كە لە فەلوجەوە هاتبوونە هەولێر توشی كۆرۆنا بوون و پێنجیان لەچاودێری چڕ داخڵكراون و گیانیان لەدەستداوە.

دكتۆرە سۆزی جامباز بەڕێوەبەری نەخۆشخانەی لالاڤ لەهەولێر بە PUKmediaی راگەیاند: لەئێستادا سەرجەم قەرەوێڵەكانی چاودێری چڕ لەنەخۆشخانەكانی شارەكە پڕبوون و نیوەیان ئەو گەنجانەن كە بەقورسی توشی پەتاكە بوون.

وتیشی: لەدوو رۆژ پێش جەژنەو ژمارەی توشبووان بەشێوەیەكی بەرچاو رووی لە زیادبوون كردوە، لەنەخۆشخانەكانی كۆرۆنا لە هەولێر هەموو قەرەوێلەكانی چاوێری چڕ پڕبوون.

بەڕێوەبەری نەخۆشخانەی لالاڤ باسی لەوەشكرد: هەر نەخۆشێك چاكبێتەوە یان گیان لەدەستبدات یەكسەر كەسێكی دیكە دەخرێتە سەر قەرەوێلەكەی.

ئەوەشی خستەڕوو: جۆری نوێی كۆرۆنا كە بەدەلتا ناسراوە بەخێرایی بڵاودەبێتەوەو لەناو جەستەش وەكو كۆرۆنا نوێ نییە كە ماوەیەك لە قوڕگی بمێنێتەوەو دوای چارەسەر نەمێنێت، دەلتا بەشەوو رۆژێك لەناو جەستە بڵاودەبێتەوەو سییەكانی نەخۆش دەگرێتەوە.

بەڕێوەبەری نەخۆشخانەی لالاڤ دەشڵێت: زۆربەی توشبووان گەنجانن كە رەوانەی چاودێری چڕ دەكرێن و نیوەی قەرەوێلەكانی چاودێری چڕ لە نەخۆشخانەكەیان گەنجن، كە بەقورسی نەخۆشییەكەیان گرتووە، بەڵام هۆكارەكانی بڵاوبوونەوەی خێرای پەتاكە، پابەندبوون بە رێنماییەكان و هاتنی گەشتیارانە.

بەوتەی ئەو پزیشكە، رۆژێك پێش جەژن پاسێك مامۆستای گەشتیار كە لە فەلوجەوە هاتبوونە هەولێر توشی كۆرۆنا بوون و پێنجیان لەچاودێری چڕ داخڵكراون و گیانیان لەدەستداوە.

PUKmedia بیلال بارزان – هەولێر