Trump: Bersiva Îranê ji bo pêşniyara Amerîkayê nayê qebûlkirin

Ajans

Alên Îran ûAmerîka

Serokê Amerîkayê Donald Trump bersiva Îranê ya ji bo pêşniyara Washingtonê wekî "bi tevahî nayê qebûlkirin" bi nav kir, di dema xwendina naveroka wê de yekser redkirina xwe tekez kir.

Di postek li ser Truth Social de, Trump nivîsand, "Niha min bersiva Îranêx wend , ew ne bi dilê min bû û qet nayê qebûl kirin.
Wall Street Journal hûrguliyên bersiva Îranê ya ji bo pêşniyara Amerîkayê eşkere kir. Li gorî rojnameyê, Tehranê red kir ku tesîsên xwe yên nuklerî hilweşîne lê qebûl kir ku uranyuma xwe kêm bike û yê mayî veguhezîne welatekî sêyemîn.

Rojnameyê ragihand ku bersiva Îranê pêşniyarek ji bo gotûbêjkirina mijarên nukleerî di nav 30 rojên bê de dihewîne. Tehranê pêşniyar kir ku şer bi dawî bibe û Tengava Hormizê hêdî hêdî ji nû ve were vekirin di berdêla rakirina dorpêçan de.

Medyaya dewleta Îranê roja Yekşemê ragihand ku bersiva Tehranê ya ji bo pêşniyara aştiyê ya dawî ya Amerîkayê mijara bernameya xwe ya nukleerî paşguh kiriye, li şûna wê bal kişandiye ser bidawîanîna şerê berdewam li herêmê. Li gorî ajansa nûçeyan a fermî ya Îranê IRNA, pêşniyara dijber, ku bi rêya navbeynkarên Pakistanî hatiye şandin, di serî de armanc dike ku ewlehiya sefera bi rêya Tengava Hormizê garantî bike berî ku her danûstandinek li ser mijarên hesastir, di nav de bernameya nukleerî ya Îranê, dest pê bike.

Li gorî New York Post, pêşniyara dawî ya Amerîkayê peymanek ji bo bidawîkirina şer, vekirina tengavê ji bo keştiyên navneteweyî û sînordarkirina bernameya nukleerî ya Îranê dihewand.

Ji aliyê xwe ve, Serokê Îranê Mesûd Pizişkiyan di postekê de li ser platforma X diyar kir ku welatê wî "li hember dijberên xwe serî natewîne û got ku axaftina li ser diyalog an danûstandinê "nayê wateya teslîmbûn an paşvekişandinê, lê belê armanc dike ku mafên gelê Îranê biparêze û berjewendiyên neteweyî bi tundî û bi biryardarî biparêze.

Berevajî vê, Trump soz da ku heke Tehran bi pêşniyara dawî ya derbarê sînordarkirina bernameya xwe ya nukleerî û vekirina Tengava Hormizê de razî nebe, dê hêza leşkerî ya Amerîkî bikar bîne. Serokê Amerîkayê her wiha îşaret bi egera ji nû ve aktîvkirina Operasyona Azadiyê kir, ku tê de keştîyên Hêzên Deryayî yên Amerîkayê keştiyên bazirganî di tengavê re dişopînin, heke danûstandin bi ser nekevin.

Di heman demê de, Balyozê Amerîkayê li Neteweyên Yekbûyî Mike Waltz di hevpeyvînekê de bi ABC re got ku Trump derfetê dide rêya dîplomatîk berî ku vegere şer.


PUKMEDIA