Serokatiye Komar:Ji bo hinardekirina petrolê çareserî girînge

Serokatiya Komarê

Serokatiya Komara Îraqê

Serokatiya Komara Îrqê bang li hemûyan kir ku ji bo destpêkirina hinardekirina petrolê hevahengiyê bikin û tekez kir ku, dîtina çareseriyek ji bo hinardekirina petrola Îraqê pir girîng e û xizmeta berjewendiyên welêt dike.

Serokatiya komara Îraqê derbarê hinardekirina petrolê de daxuyaniyek belav kir û ragihand ku, di vê rewşa hestyar de, em pabendbûna xwe ya bi yekîtiya neteweyî di navbera hemû ewladên gelê Îraqê de û pêwîstiya dûrketina ji nakokiyên duyemîn yên ku xizmeta berjewendiya giştî nakin, dubare dikin.

Her weha got: Dîtina çareseriyek ji bo hinardekirina petrola Îraqê gelekî girîng e û xizmeta berjewendiyên welêt dike, di vî warî de, em bang li Hikûmeta Federal û Hikûmeta Herêma Kurdistanê dikin ku ji bo ji destpêkirina hinardekirina petrola xav bo derveyî Îraqê hevkariyê bikin.

Serokatiya Komara Îraqê bang li Civata Nûneran kir ku bi giyanê berpirsiyariya neteweyî tevbigerin daku berjewendiyên neteweyî pêşve bibin û ji bo dûrketina ji pevçûnan kar bikin.

Di dawiyê de, serokatiya Komara Îraqê tekez kir ku sîstema Federal li ser yekrêzî û hevkariya di navbera hemû desthilat û pêkhateyan de hatiye avakirin, ev jî pêwîtî bi wê yekê heye ku  her kes giyanek berpirsiyariyê nîşan bide û ji bo xurtkirina têgihîştin û yekîtiya neteweyî, û dûrketina ji pevçûnan kar bikin.

PUKMEDIA