Serok Bafil: Em rêzê li serwerî û ewlekariya welatên cîran digirin

Nivîsgeha Ragihandinê ya Serokê YNKê

Civîna Serokê YNK gel şanda NY

Serokê Yekîtiya Niştimanî ya Kurdistanê (YNK) Bafil Celal Talebanî pêşwaziya şandeke Netewên Yekgirtî bi serokatiya Claudio Cordon Cîgirê Nûnerê Taybetî yê Sekreterê Giştî yê NY li Iraqê bo karûbarên siyasî û hevahengiya hilbijartinan kir.

Di hevdîtinê de pirsa hilbijartinan, rewşa asayîşa Herêma Kurdistanê û navçeyê û pirsgirêkên navbera Hewlêr û Bexdayê hate gotûbêjkirin û tekez li ser berdewamiya diyaloga avaker di navbera aliyan de ji bo çareserkirina pirsgirêkên  navxwe hat kirin di çarçoveya destûrê û parastina mafên her kesî de.

Serok Bafil Celal Talebanî derbarê hilbijartinên Herêma Kurdistanê û lidarxistina wan di roja diyarkirî de got: Em pabend in bi wê roja ku ji bo lidarxistina hilbijartinan hatiye diyar kirin û divê hemû aliyên din jî pêbend bin, ji ber ku paşxistin û astengî li pêşiya hilbijartinan xizmeta ti kesî nake."

Rewşa ewlekarî û hewlên ji bo vegerandina aramiyê li navçeyê mijareke dinê vê hevdîtinê bû, ku Serok Bafil  di vê derbarê de got: Helwesta me zelal e û em piştgîriya diyalog û têgihiştinê dikin ku baştirîn bijarde bo çareser kirina pirsgirêkan û ne aloztir kirina rewşê. Em rêzê li serwerî û ewlekariya welatên cîran digirin û ji bo pêkanîna aştî û xebata hevbeş di çarçoveya parastina berjewendiyên netewî de pêşwazî dikin.”

Derbarê peywendiyên navbera Hewlêr û Bexdayê û bidawîkirina pirsgirêkan de jî Serok Bafil diyar kir: Yekîtiya Niştimanî ya Kurdistanê siyaseteke niştimanî dişopîne ku li ser parastin û bihêzkirina pêkhateya Herêma Kurdistanê ye û baweriya me bi xebata hevbeş û şirîkatiyeke rast heye di birêvebirina welat de û armanca me parastina mafên her kesî di çarçoveya destûrê de ye û divê her kes rastiyê bizane ku  dema yekdestdariya hikûmetê û siyaseta ferzkirina îradeyê derbas bûye û pêwîstiya welat  bi aştiyê, aramî, û dabînkirina jiyaneke baştir ji bo welatiyên xwe heye , ne nakokiyên neqanûnî.”

PUKMEDIA