كۆسرەت رەسوڵ بۆPUKmedia : هەمیشە بەمتمانەو راستگۆییەوە بەردەوامبن

.

كۆسرەت رەسوڵ عەلی جێگری سكرتێری گشتی یەكێتیی نیشتمانیی كوردستان بەبۆنەی یادی 16یەمین ساڵەی دامەرزاندی PUKmediaەوە، پیرۆزبایی لە سەرنووسەرو رۆژنامەنووسان و كارمەندانی دەكات و دەڵێت: لەشانزەهەمین ساڵیادی ماڵپەڕی  PUKmediaی ئازیزدا، گەرمترین پیرۆزبایی خۆمتان ئاڕاستە دەكەم و دەخوازم هەمیشە بەمتمانەو راستگۆییەوە بەردەوام بن.

كۆسرەت ڕەسول پیرۆزبایی لە ماڵپەڕی PUKmedia دەكات

بەڕێزان: سەرنووسەرو ڕۆژنامەنووسان و كارمەندانی ماڵپەڕی PUKmedia

لە شانزەهەمین ساڵیادی ماڵپەڕی PUKmediaی ئازیزدا، گەرمترین پیرۆزبایی خۆمتان ئاراستە دەكەم و دەخوازم هەمیشە بەمتمانەو ڕاستگۆییەوە بەردەوام بن.

PUKmedia لە شانزە ساڵ تەمەنی خۆیدا توانیویەتی خزمەتێكی دیارو بەرچاو بەمیدیای ئەلیكتڕۆنی كوردی بكاو هەمیشە پیشەییانە كاربكا بۆ گەیاندنی دەنگ و ڕەنگە جیاوازەكان، هاوكات یەكێك لە خوێندنگا زۆر باشەكانی پێگەیاندنی كادیری میدیایی و ڕۆژنامەنووس بووە لە كوردستاندا، كە ئێستا ڕۆژنامەنووسانی ئەوێ ڕۆژێی PUKmedia لە دەزگا ڕاگەیاندنە جۆراوجۆرەكان خزمەت دەكەن.

هەڵكردنی مۆمێكی تر لە تەمەنی PUKmedia چەندە دەستكەوت و سەركەوتنێكی گەورەیە، زۆر زیاتر لەوە ئەرك و بەرپرسیارێتیەو پێویستە ستافە ماندوونەناسەكەی PUKmedia لەجاران باشتر بەرپرسیارانە مامەڵە بكەن و پیشەییانە كاری میدیایی خۆیان ئەنجام بدەن و ببنە پێشەنگی میدیای ئەلیكترۆنی لە كوردستاندا.

كۆسرەت ڕەسول عەلی

جێگری سكرتێری گشتی

یەكێتيی نیشتمانيی كوردستان

PUKmedia