كۆسرەت رەسوڵ: یەكگوتاری لایەنە كوردستانییەكان بنەمایەكی بەهێزە

.

‎ ‎هەریەك لە كۆسرەت ڕەسول عەلی و باڵیۆزی ئوسترالیا لە عیراق جەخت لە هەماهەنگی زیاتری نێوان هەردوولا دەكەنەوە بەمەبەستی دابینكردنی ئارامی زیاترو سەركەوتنی زیاتری سەربازی بەرامبەر تیرۆرستان.

‎ئەم وتانەی هەردوولا، ئێوارەی ئەمڕۆ 14-10-2018 لەشاری سلێمانی، لەمیانی پێشوازیكردنی كۆسرەت ڕەسول عەلی جێگری سكرتێری گشتی یەكێتی نیشتمانی كوردستان لەجوان لۆندێز باڵیۆزی ئوسترالیا لەعێراق و مایك شرایف سكرتێری باڵیۆزخانە هات.

‎لە دیداری نێوانیاندا، جێگری سكرتێری گشتی سوپاسی ئوسترالیای كرد كە لە جەنگی دژ بەتیرۆرستان هاوكاری هێزی پێشمەرگەو هێزە عیراقییەكان بوونەو داوای كرد بەردەوام بن لە هاوكاری كردنی هێزەكانی پێشمەرگە.

‎تەوەرێكی تری دیدارەكە گفتوگۆكردن بوو لەبارەی دۆخی عێراق و هەرێمی كوردستان، باڵیۆزی ئوسترالیا جەختی لەوە كردەوە كە بەلای ئەوانەوە گرنگە هەرێمی كوردستان و عیراق دۆخێكی ئارامیان هەبێ و ئەمن و ئاسایش تێیدا بەرقەرار بێ.

‎پەیوەست بەدۆخی عیراق و هەنگاوەكانی پێكهێنانی حكومەتی نوێ و بەشداری كورد لەو حكومەتە، سەرەڕای گفتوگۆی چڕوپڕی بابەتەكە، كۆسرەت ڕەسول ڕایگەیاند: هەر لە سەرەتاوە یەكێتی ئامانجی بووە لایەنە كوردستانییەكان بەیەك پاكێج بەشداری لە گفتوگۆكانی پێكهێنانی حكومەت بكەن و هەوڵی بەدەستهێنانی مافە نەتەوەییەكانی كورد بدەن.

‎جێگری سكرتێری گشتی گوتیشی لەئێستاشدا بە هەمان شێوە یەكدەنگی و یەكگوتاری لایەنە كوردستانییەكان بە بنەمایەكی بەهێز دەزانین بۆ دەستكەوتی گەورەتر بۆ گەلەكەمان و چەسپاندنی مافە چەسپێنراوەكانی دەستوور و هەوڵی جدیش دەدەین بۆ ئەم پرسە

‎هەڵبژاردنی پەرلەمانی كوردستان و پرسی پێكهێنانی حكومەتی نوێی هەرێمی كوردستان دوو پرسی گرنگی دیدارەكە بوون و گفتوگۆی چڕوپڕیان لەبارەوە كرا.

PUKmedia  نوسینگەی رۆژنامەوانی كۆسرەت رەسوڵ