دادوه‌ران تا ئێستا له‌هه‌ولێر ئاماده‌ی ژماردنه‌وه‌ی ده‌ستی ده‌نگه‌كان نه‌بوون

.

به‌هۆی ئاماده‌نه‌بوونی دادوه‌ران پرۆسه‌ی جیاكردنه‌وه‌ی ده‌ستی ده‌نگه‌كان له‌ هه‌ولێر هێشتا ده‌ستی پێنه‌كردووه‌،بڕیار 214 سندوقی ده‌نگدان له‌هه‌ولێر دووباره‌ به‌ ده‌ست هه‌ژمار بكرێنه‌وه‌.

هه‌رچه‌ند بڕیاربوو ئه‌مڕۆ چوارشه‌ممه‌ 11-7-2018 پرۆسه‌ی جیاكردنه‌وه‌ی ده‌ستی ده‌نگه‌كان له‌ شاری هه‌ولێر ده‌ستپێبكات، به‌ڵام تا ئێستا به‌هۆی ئاماده‌نه‌بوونی دادوه‌ران ده‌ستی پێنه‌كردووه‌.

د. بڕیار ره‌شید وته‌بێژی ده‌زگای هه‌ڵبژاردنی یه‌كێتیی نیشتمانیی كوردستان به‌ PUKmedia ی راگه‌یاند: ئه‌مڕۆ پرۆسه‌ی هه‌ژماركردنه‌وه‌ی ده‌ستی ده‌نگه‌كان له‌ شاری هه‌ولێر ده‌ستپێده‌كات و وه‌ك یه‌كێتیی نیشتمانیی كوردستان وه‌ك چۆن له‌ رابردودا ئه‌وه‌مان دووپاتكردوه‌ته‌وه‌ كه‌ له‌گه‌ڵ یاساو بڕیاره‌كانی كۆمسیۆنی باڵای سه‌ربه‌خۆی هه‌ڵبژاردنه‌كانین و دڵنیاشین له‌ ده‌نگه‌كانی خۆمان له‌ هه‌موو شاره‌كانی كوردستان و نه‌ك به‌ته‌نها له‌ كه‌ركوك و سلێمانی، به‌ڵكو له‌ شاری هه‌ولێریش.

د. بڕیار راشیگه‌یاند: ئێمه‌ له‌ پرۆسه‌ی هه‌ڵبژاردن له‌ پارێزگای هه‌ولێر تێبینی و سكاڵای زۆرمان تۆماركردوه‌و به‌شێوه‌یه‌كی یاسایی سكاڵاو تێبینییه‌كانمان راده‌ستی كۆمسیۆن كردوه‌و چاوه‌ڕی ئه‌وه‌ ده‌كه‌ین وه‌ڵامه‌كان وه‌ربگرینه‌وه‌، هه‌روه‌ها وتی: چۆن له‌ ده‌نگه‌كانمان دڵنیابوون له‌ كه‌ركوك و سلێمانی له‌ هه‌ولێریش هه‌روا دڵنیاین و چاوه‌ڕێی ئه‌نجامی پرۆسه‌ی هه‌ژماركردنه‌وه‌ی ده‌ستی ده‌نگه‌كان ده‌كه‌ین له‌ شاری هه‌ولێریش.

PUKmedia