هه‌ڵه‌بجه‌.. رێز له‌ خۆبه‌خشانی سه‌نته‌ره‌كانی كۆڕۆنا ده‌گیرێت

.

به‌ئاماده‌بوونی  ئازاد تۆفیق پارێزگاری هه‌ڵه‌بجه‌ و سه‌رتیپ عه‌لی لێپرسراوی مه‌ڵبه‌ندی ڕێكخستنی9 ی شاره‌زوور، و به‌ڕێوبه‌ری گشتی ته‌ندروستی هه‌ڵه‌بجه‌ و ژماره‌یه‌ك له‌به‌ڕێوبه‌ره‌ گشتیه‌كان به‌ڕێوبه‌رایه‌تی گشتی ته‌ندروستی هه‌ڵه‌بجه‌ له‌ مه‌ڕاسیمێكدا خه‌ڵاتی ڕێزلێنانیان به‌خشیه‌ زیاتر له‌ 80پزیشك و كارمه‌ندی ته‌ندروستی كه‌ به‌شێوه‌یه‌كی خۆبه‌خشانه‌ له‌ سه‌نته‌ره‌كانی كۆڕۆنادا خزمه‌تیانكردووه‌.

 ئازاد تۆفیق پارێزگاری هه‌ڵه‌بجه‌ به‌ناوی ئیداره‌ی پارێزگای هه‌ڵه‌بجه‌وه‌ سوپاسی ئه‌رك و ماندووبوونی كردن و ڕایگه‌یاند: سوپاستان ده‌كه‌ین كه‌ نه‌تانهێشت سه‌نته‌ره‌كانی كۆڕۆنا چۆڵبن و به‌ پشتیوانی ئێوه‌ زۆرێك له‌ مه‌ترسیه‌كان ڕه‌وینه‌وه‌، هه‌روه‌ك چۆن سوپاسی هه‌موو پزیشك و كارمه‌نده‌كانی دیكه‌ی حكومه‌تی كرد له‌ كه‌رتی ته‌ندروستی.

لای خۆشیه‌وه‌ د. ئازاد مسته‌فا به‌ڕێوه‌به‌ری گشتی ته‌ندروستی هه‌ڵه‌بجه‌ له‌ لێدوانێكدا به‌ PUKmedia ی ڕاگه‌یاند: به‌ هه‌وڵی هاوسه‌رۆكان و به‌ پشتیوانی خۆبه‌خشان قۆناغه‌ سه‌خته‌كانی سه‌ره‌تای ڤایرۆسی كۆڕۆنامان به‌ڕێكرد، ئه‌مان توانیان شوێن و بۆشاییه‌كی گه‌وره‌مان بۆ پڕبكه‌نه‌وه‌، كه‌ بۆ ئێمه‌ مایه‌ی پێزانینه‌ و داوا له‌حكومه‌تی هه‌رێم ده‌كه‌ین له‌به‌ر پێویست بوون به‌ ڕاژه‌كانیان دایانبمه‌زرێنێت.

دواتر  له‌سه‌ر ئه‌ركی مه‌ڵبه‌ندی ڕێكخستنی 9ی شاره‌زووری (ی. ن. ك) بانگهێشتی نیوه‌ڕۆ خوانێك كران .

PUKmedia فه‌رحان حه‌مه‌خان/ هه‌ڵه‌بجه‌