گەشتەکانی فڕۆکەخانەی نێودەوڵەتیی جەلال تاڵەبانی دەستیپێکردەوە

PUKMEDIA

فڕۆکەخانەی نێودەوڵەتیی جەلال تاڵەبانی

دوای ئەوەی لەچەند رۆژی رابردوودا دەستەی فڕۆکەوانی مەدەنی عیراقی، دەستپێکردنەوەی گەشتە ئاسمانییەکانی لەدوای زیاتر لە 40 رۆژ راگەیاند، ئەمڕۆ یەکەم گەشتی ئاسمانی لە فڕۆکەخانەی نێودەوڵەتیی جەلال تاڵەبانییەوە ئەنجام درا.

دانا محەمەد لێپرسراوی راگەیاندن و پەیوەندییەکانی فڕۆکەخانەی فڕۆکەخانەی نێودەوڵەتیی جەلال تاڵەبانی بە PUKMEDIA ی راگەیاند: لەدوای زیاتر لە 40 رۆژ بەرەبەیانی ئەمڕۆ یەکەم گەشتی ئاسمانی لە فڕۆکەخانەکەمانەوە بەرەو ئوردن دەستیپێکردو بڕیاریشە هەر ئەمڕۆ گەشتی پێچەوانە ئەنجام بدرێت.

راشیگەیاند: بەپێی ئەو خشتەیەی دەستەی فڕۆکەوانی مەدەنی عیراقی بۆیان ناردووین، گەشتەکانی فڕۆکەخانەی نێودەوڵەتیی جەلال تاڵەبانی لەڕۆژانی داهاتووشدا بەردەوام دەبێت.

ئەمەش لەکاتێکدایە، زیاتر لە 40 رۆژە بەهۆی جەنگی ئەمریکا و ئیسرائیل دژی ئێران، بەبڕیاری دەستەی فڕۆکەوانی مەدەنی عیراقی گەشتی فڕۆکەخانەکانی عیراق تەنانەت ئەو فڕۆکانەشی کە بەسەر ئاسمانی عیراقدا ئەنجام دەدران راگیران، دوای راگەیاندنی ئاگربەستیش بڕیاری کردنەوەی گەشتەکان درا، بەجۆرێک لەڕۆژی 11ی4ی2026 یەکەم گەشت لەفڕۆکەخانەی هەولێرەوە دەستیپێکرد و ئەمڕۆش گەشتەکانی فڕۆکەخانەی نێودەوڵەتیی جەلال تاڵەبانی دەستیپێکردەوە.

PUKMEDIA