ژمارەیەكی نوێی گۆڤاری نوێبوونەوە بڵاوکرایەوە

PUKMEDIA

وێنەى بەرگى گۆڤارى نوێبوونەوە

لەم رۆژانەدا ژمارە (22)ی گۆڤاری نوێبوونەوە بە دیزانێكی جیاواز و كۆمەڵێك بابەتی نوێوە بڵاوکرایەوە.

ئەم ژمارەیەی نوێبوونەوە كە یەكەم ژمارەی ئەمساڵ (2026)ە، ئەم بابەتانەی لە خۆگرتووە:

1."سامی هادی: با مۆسیقا بكەینە بەرنامەی ئاشتی" دووبارە بڵاوكردنەوەی گفتوگۆیەكە لەگەڵ شاعیر و تێكۆشەری نەمر سامی هادی كە ساڵی (2021) لەگەڵیدا سازدراوە و تیایدا سەبارەت بە شیعر و مۆسیقا و گەلێ بابەتی دیکە، وەڵامی پرسیارەكانی داوەتەوە، ئەم گفتوگۆیە یادگاریی بە هەشتی سامی هادیە و بەڵگەی ئەوەیە ئەم شاعیرە جوان پەرستە چ رۆشنبیرییەكی قووڵی هەبووە سەبارەت بە شیعر و مۆسیقا و ئەدەب و هونەر بە گشتی.

2. "دۆسێی ئەم ژمارەیە سەبارەت بە ئینشیقاق یان جیابوونەوەی حزبییە و سێ بابەتی لەخۆگرتووە": (سەرەڕای پێنج ئینشیقاق یەكێتی هەروا لەسەر پێی خۆی راوەستاوە) ئەم بابەتە باس لە وزە و توانای یەكێتی دەكات لە تێپەڕاندنی ئەو قەیرانە ناوخۆییانەی بە درێژایی مێژووی پەنجا ساڵەی تووشی بووە و توانیویەتی قەیرانەكان تێپەڕێنێت و گەشە بكات و بەرەو پێشەوە بچێت، (ململانێ و كەرتبوونی حزب) لێكۆڵینەوەیەكی محەمەد فاتیحە سەبارەت بە ململانێ و كێشەكانی ناوخۆی حزب و هۆكارەكانی و سەرەنجام كەرتبوونی حزب، (هۆیەكانی مەیلی لەتبوون لە حزبە سیاسییەكاندا)  وتارێكی (عەبدوڵڵا عەتوی تەوالبە) یە و لاوك حەسەن لە عەرەبییەوە كردوێتی بە كوردی.

3. گفتوگۆی كراوە، بریتییە لە گفتوگۆیەكی تەها سلێمان لەگەڵ د. ئاریان رەئووف سەبارەت بە جینۆسایدی نەرم و شێوازەكانی و مەترسییەكانی، هەروەها خستنەڕووی كۆمەڵێك نموونە سەبارەت بە جینۆسایدی نەرم و پێداچوونەوەی ئەو جینۆسایدانەی تا ئێستا لە كوردستان بەرامبەر كورد پیادەكراون.

4. "لێكدانەوەی دیلبەرا ئانی، شاكاری مەحمود نەجمەدین" شیكردنەوەیەكی محەمەد كەریمە سەبارەت بە تازەترین بەرهەمی مەحموود نەجمەدین و یەكاڵاكردنی لایەنە تەمومژاوییەكانی ئەم بەرهەمەی كە نووسەر پێی وایە هەتا ئێستا شاكاری چیرۆكنووس و رۆماننووس مەحموود نەجمەدینە.

5. "ئەلف و بێی سیاسەت" لێكۆڵینەوەیەكی مەلا بەهادینە سەبارەت بە سیاسەت و لێكدانەوە جیاوازەكان بۆ سیاسەت و شەن و كەوكردنی بیروبۆچوونە جیاوازەكان و ورد و درشت لە بارەی سیاسەت و سیاسەتمەدارانەوە.

6. "پەروەردە لە نێوان خوێندنی حكومی ئەهلیدا" راپۆرتێكی خاتوو چنار عەزیزە سەبارەت بە خوێندنی حكومی و خوێندنی ئەهلی و بەراوردكردنی ئەم دوو شێوازە خوێندنەی ئێستا لە كوردستان هەن، هەروەها وەرگرتنی بیروبۆچوونی مامۆستایانی هەردوولا و نیشاندانی خاڵە باش وخراپەكانی هەردوولا.

7. "بۆچی عەلی وەردی بخوێنینەوە؟" وتارێكی حەسەن یاسینە دەربارەی كۆمەڵناسی شارەزا و بلیمەتی عیراقی دكتۆر عەلی وەردی، نووسەر وێڕای قۆناغەكانی ژیانی عەلی وەردی و چۆنێتی پێگەیشتنی و بەناوبانگبوونی باسی ئەوەش دەكات بۆچی پێویستە هەموو كوردێك عەلی وەردی بخوێنێتەوە؟

8. "رەگەزی كات لە رۆماندا" وتارێكی گرنگی شارەزای هونەری رۆمان (ناهید جەلالی) یە و سەرنووسەر لە فارسییەوە كردوێتی بە كوردی، باس لەوە دەكات رۆماننووس پێش ئەوەی دەست بداتە نووسینی رۆمان پێویستە شارەزای كات بێت و بزانێت چۆن كات لە رۆمانەكەیدا بەكاردەهێنێت.

نوێبوونەوە گۆڤارێكی سیاسی كەلتوری دوو مانگانە، مەكتەبی راگەیاندن و هۆشیاری دەریدەكات.

PUKMEDIA