ئاسۆ مامەند: بەرامبەر دەنگی کەرکوکیەکان 178 هەزار نەمام دەڕوێنین

PUKMEDIA

کۆنگرەی رۆژنامەوانی ئاسۆ مامەند و رێبوار تەها

سەرپەرشتیاری كەركوك-سەڵاحەدینی یەكێتی سوپاسی دەنگدەرانی کەرکوک دەکات و رایدەگەیەنێت: بەرامبەر هەر دەنگێکی کەرکوکییەکان لەم هەڵبژاردنە بۆ یەکێتی کە زیاتر بوو لە 178 هەزار دەنگ، 178 هەزار نەمام دەڕوێنین.

دەنگەکانی یەکێتی 13٪ زیادی کردووە

ئاسۆ مامەند سەرپەرشتیاری كەركوك-سەڵاحەدینی یەكێتی لە کۆنگرەیەکی رۆژنامەوانیدا لەگەڵ رێبوار تەها پارێزگاری کەرکوک رایگەیاند: سەربەرزین بە خەڵکی کەرکوک و دەنگدەرانمان، دڵنیاتان دەکەینەوە چۆن لە رابردوو کاری باشمان بۆ کەرکوک کردووە، لە داهاتوش بەردەوام دەبین.

وتیشی: راستە وەک کورد دەنگمان فەوتاوە لەم هەڵبژاردنە، بەڵام ئەوە بەهۆی ئەو حزب و لایەنانەوە بووە کەبەشداری هەڵبژاردن بون و دڵنیابوون کە دەنگ ناهێنن، هاوکات پارتی دیموکراتی کوردستانیش بەهۆی دەنگدانیان بە کۆتای مەسیحی دەنگی کوردیان فەوتاند، بەڵام وەک یەکێتیی نیشتمانیی کوردستان بەراورد بە هەڵبژاردنەکانی پێشوو 13٪ دەنگمان زیادی کردوە، کە نیشانەی ئەوەیە یەکێتی و کەرکوک لێک جیانابنەوەو ئێمەش خۆمان بە خزمەتکاریان دەزانین.

راشیگەیاند: بەرامبەر هەر دەنگێکی کەرکوکییەکان لەم هەڵبژاردنە بۆ یەکێتی کە زیاتر بوو لە 178 هەزار دەنگ، 178 هەزار نەمام دەڕوێنین و هاوکاری ئیدارەی کەرکوک دەبین، هاوکات وەک بەردەوامی خزمەتەکانمان ژمارەیەک شوقە دابەش دەکەین و هاوکاری خاوەنپێداویستییە تایبەتەکان دەکەین و هاوکار و پشتیوانی گەنجان دەبین.

دەڵنیاین لە زیاتربونی دەنگەکانمان لەداهاتوو

هەر لە کۆنگرەکەدا رێبوار تەها پارێزگاری کەرکوک رایگەیاند: بەپێی بەرنامەی کار و خزمەتمان وەک حزب و حکومەتیش دڵنیاین لەساڵانی داهاتوو دەنگەکانمان زۆر زیاتر دەبێت و دڵنیاین کۆمەڵانی خەڵکی کەرکوک پشتیوانی ئێمەن، ئومێدەواربوین پارتیش ئەو کورسیەی لەدەست نەدایە، بەڵام ئێمە وەک یەکێتی بەراورد بەهەڵبژاردنی رابردوو کورسیەکمان زیاد کردوە.

PUKMEDIA