گەنجانی شارپارێزی کەرکوک بۆ رێبوار تاڵەبانی:ناتوانێت پۆڵێنی كەركوكی رەسەن و ناڕەسەن بكات

PUKMEDIA

کەرکوک

گروپی گەنجانی شارپارێزی کەرکوک، ئەمڕۆ 14ى11ى2025 روونکردنەوەیەکیان بڵاوکردەوە و رایانگەیاند: ئێمە گەنجانی شارپارێزی كەركوك بەتوندی ئیدانەی قسەكانی "رێبوار تاڵەبانی " دەكەین و وێناكردنی نزیك بە دووسەد هەزار هاووڵاتی كەركوك بە ناڕەسەن بە سوكایەتی و پێشێلكاری دەزانین و ئەو رەفتار و لێدوانەی بە نابەرپرسانە دەزانین.

لە روونکردنەوەکەدا هاتووە: رێبوار تاڵەبانی سوكایەتی بە كەركوكییە رەسەن و خۆراگرەکان دەكات و ئەوە روونکراوەتەوە: لە یادەوەری زۆر كەس نەماوە كە كەسێك هەبوو، سەرۆکی ئەنجوومەنی پارێزگای کەرکوک بوو، ناوی رێبوار تاڵەبانی بوو، لەو سەردەمەدا کەرکوکییەکان بەتایبەتی یەکێتییەکان رێزێکی تایبەتییان لێدەگرت و بەردەوام پشتیوانی بوون، بەڵام بەبێ ئەوەی پابەندییە سیاسی و حزبیەكەی خۆی رەچاو بكات و نمەك حەڵاڵی ئەوە بێت كە لەسەر لیستی كێ چووەتە ئەنجوومەن، ژێر بە ژێر حزبەكەی خۆشی بەجێهێشت و خەریكی پاكانە و شاباشە بۆ حزبێكی دیکە.

ئەوەشخراوەتەڕوو: ئەم كەسە چەند ساڵێكە خۆی لە كەركوك دابڕیوە و نەیتوانیووە وەك كەركوكییە رەسەنەكان لە شارەكەی خۆیدا بمێنێتەوە و تەنانەت بۆ دەنگدانیش بگەڕێتەوە، هەربۆیە لای كەركوكییەكان کەسێکی پەسەند نیە و لەئێستاشدا هەر قسەیەک لەسەر کەرکوک بکات، لەلایەن خەڵکی کەرکوکەوە قسەکانی بێ بایەخ دێنە بەرگوێ و كەس گوێی بۆ ناگرێت، بەتایبەت كە كەسێكی بەزیوی راكردوی وەکو ناوبراو، ناتوانێت پۆڵێنی كەركوكی رەسەن و ناڕەسەن ـ ی كەركوكی بكات.

 ئاماژەبەوەشدراوە: ئێمە گەنجانی شارپارێزی كەركوك بەتوندی ئیدانەی قسەكانی دەكەین و وێناكردنی نزیك بە دووسەد هەزار هاووڵاتی كەركوك بە ناڕەسەن بە سوكایەتی و پێشێلكاری دەزانین و ئەو رەفتار و لێدوانەی بە نابەرپرسانە دەزانین.


PUKMEDIA