ئاسایش راگەیەندراوێک لەسەر گرژییەکانی عەربەت بڵاودەکاتەوە

PUKMEDIA

لۆگۆی ئاسایش

دوێنێ شەو لە نزیک شارۆچەکەی عەربەت ئاڵۆزی لە نێوان مامۆستایان و شۆفێری بارهەڵگرەکان دروستبوو، دەزگای ئاسایشی هەرێمیش دەڵێت:" بریندارەکان نەخۆشخانەیان جێهێشتووە و لە ئێستاشدا هیچ کەس دەستگیر نەکراوە".

بەپێی راگەیەندراوێکی دەزگای ئاسایشی هەرێمی کوردستان کە کۆپییەکی بۆ  PUKMEDIA نێردراوە، دەزگای ئاسایش رایدەگەیەنێت ،  "شەوی ڕابردوو ٢٠٢٥/٢/٢٤ لە نزیک شارۆچکەی عەربەت، بەهۆکاری ڕێگریکردن لە تێپەڕبوونی ژمارەیەک بارهەڵگر لەلایەن مامۆستایان و هاوڵاتيیان، سەرئەنجام بووە هۆی دروستبوونی گرژی و ئاڵۆزی لەنێوانیاندا چەند شۆفێرێک و هاوڵاتییەک بریندار بوون".

ئاسایشی هەرێمی کوردستان ئاماژە بەوەشدەکات:" دەزگای ئاسایشی هەرێم وەک لایەنی جێبەجێکاری یاسا دەستبەجێ بەمەبەستی کۆنتڕۆڵکردنی ئەو بارودۆخە نەخوازراوە و ڕێگریکردن لە تەشەنەکردنی ئاڵۆزییەکان و سەلامەتی گیانی هەموو لایەک گەیشتنە شوێنی ڕووداوەکە و ڕێکاری یاسایی گرتەبەر بۆ هێورکردنەوەی بارودۆخەکە".

 لە کۆتایشدا ئاسایش رایدەگەیەنێت:" له ئێستادا هيچ كەس دەستگيرنەكراوه و  هاوڵاتییە بريندارەكان لە نەخوشخانه نەماون".

PUKMEDIA