بەهەوڵی فراكسیۆنی یەكێتی لیژنە بۆ ونبووەكانی هەڵەبجە پێكدەهێندرێت

PUKMEDIA

بریکاری وەزارەتی دەرەوەی عیراق و چرۆ حەمەشەریف

بە هەوڵی فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق، لیژنەیەکی تایبەت بە کەیسی منداڵە ونبووەکانی هەڵەبجە پێکدەهێندرێت و لە داهاتوویەکی نزیکدا لیژنەکە سەردانی کۆماری ئیسلامی ئێران دەکات و بەدواداچونی جددی بۆ ئەو کەیسە دەکات.

چرۆ حەمەشەریف ئەندامی ئەنجومەنی نوێنەرانی عیراق لە فراکسیۆنی یەکێتی نیشتمانیی کوردستان بە سایتی رەسمی یەکێتی PUKMEDIA ی راگەیاند: "بە هەوڵی فراکسیۆنی یەکێتی لە ئەنجومەنی نوێنەرانی عیراق لە داهاتوویەکی نزیکدا لیژنەیەک پێکدەهێندرێت بەسەرپەرشتی بریکاری وەزارەتی دەرەوە تایبەت بە کەیسی منداڵە ونبووەکانی هەڵەبجە کە 120 منداڵن، تا ئێستا لە وڵاتی ئێرانن و نەگەڕاونەتەوە هەرێمی کوردستان".

"لیژنەکە پێکدێت لە باڵیۆز عومەر بەرزنجی بریکاری وەزارەتی دەرەوە و نوێنەری پارێزگای هەڵەبجە و نوێنەرێکی منداڵە ونبووەکان و چرۆ حەمەشەریف، هەروەها لیژنەکە سەردانێکی مەیدانی نەخۆشخانەکانی ئێران دەکات، ئەو نەخۆشخانانەی کە پاش کیمیابارانکردنی هەڵەبجە، منداڵە ونبووەکانی تێدابووە و بەدواداچونێکی جددی بۆ ئەو کەیسە دەکات"، ئەندامەکەی ئەنجومەنی نوێنەرانی عیراق وادەڵێت.

چرۆ حەمەشەریف دەستخۆشی لە باڵیۆز عومەر بەرزنجی بریکاری وەزارەتی دەرەوەی عیراق کرد لەپای هاوکاری و پشتیوانی بۆ کەیسی منداڵە ونبووکانی هەڵەبجە.

دوای کیمیابارانکردنی شاری هەڵەبجە لە رۆژی 16-3-1988، کە بووە هۆی شەهیدبوونی زیاتر لە پێنج هەزار و برینداربوونی زیاتر لە 10 هەزار هاووڵاتی و دەربەدەربوون و ئاوارەبوونی دانیشتوانی شاری هەڵەبجە و ونبوونی چەندین منداڵی ئەو شارە کە تا ئێستاش نەگەڕاونەتەوە ناو کەسوکاری خۆیان، بە هەوڵی یەکێتیی نیشتمانیی کوردستان، دوای 35 ساڵ لیژنەیەک پێکهدەهێندرێت بۆ بەدواداچوونی ئەو کەیسە و شادبوونەوەی منداڵە ونبووەکان بە کەسوکاری خۆیان.
PUKMEDIA