سێڵفی دوای ریفراندۆمیش ماوە

PUKMEDIA

ریفراندۆم

مێژوو هەر شادی رۆژی ریفراندۆمەكە نانووسێت، مێژوو هەمووی دەنووسێت، ئەوەش دەنووسێت كە لەجیاتی ئەوەی بۆنەی نەتەوەیی بكەنە رۆژی تەبایی و كوردایەتی و كوردبوون و پێكەوەبوون كردیانە بۆنەی لێكترازان و لێكدابڕان.

پێش بەرواری ریفراندۆم پەرلەمانیان خڕ داخست و مقەڕی حزبەكانیان لە بادینان سوتاند، ئینجا بۆ ریفراندۆم كردیانە عید میلادی لق و ناوچە و زێرەڤانی.

کەرەستەیان دەستکەوت بۆ تەخوین و تەهوین، بۆ شاردنەوەی چاوساغی ئەمرۆیان و بۆ لادانە هەمیشەییەکەیان.

 مێژوو دەنووسێت چونكە نیەتەكە باش نەبوو، پەیوەندی بە سەربەخۆیی و سەرفرازییەوە نەبوو، بۆیە لەجێی سەربەخۆیی، سەرەخۆری لێ كەوتەوە.

ئەوانە مەبەستیان نەبوو كوردستان سەربەخۆ بێت و ئیتر كەرەستەی موزایەدەی نەتەوەییان لەدەست نەمێنێت، گەرەکیان بوو فەرهەنگی من منۆكی پەرەپێبدەن و بڵێن ئێمە كردمان لێی دەرباز بوین و پاداشتمان دەوێتەوە، ئێوەش لە کەرکوک خوێنتاندا کەچی ئێمە یاداشتمان دەبێت لەسەرتان كە واو و وان.

هیچ دیمەنێك ناتوانێت ریفراندۆم و بەدواداهاتووەكانی لە 16 ئۆكتوبەر شەرح بكات، رووداوەكەی ئەم دواییەی كەركوك نەبێت.

دیمەنی شەڕ لەسەر مەقەڕی دونیایی لە رۆژی (٢-٩-٢٠٢٣  )كە تێكۆشەری یەكێتی خوێنی لەسەردا وەكو شانۆی ئەو ساڵەی ریفراندۆم وایە كە هەر پێشمەرگەی یەكێتی نرخەكەی دا و دوایی جەماعەت خۆیان لێدزییەوە.

سەیرە لە کوردستان هەمووی نەک هەر لە کۆیە، وەك چۆن بخوازیت دیمەنی رووداوێك بە دراما دووبارە بكەیتەوە رۆژی ( ٢ی ئەیلولی ئەمساڵ ) لە رێگەی شۆراو ، رێگەی كەركوك-هەولێر هەمان بەسەرهاتەكانی 25ی ئەیلول تا 16ی ئۆكتۆبەری 2017 بە چڕی و بە مینی رووداو دووبارە كرایەوە.

رۆژی ریفراندۆم دەبوایە رۆژی یەكێتی نەتەوەیی بێت بە سەركەوتن و بە ژێركەوتنییەوە، سەركەوتوو بوایە هی ئەوەبوو دەمڕاستانی وڵات باوەش بۆ نەتەوە و نیشتمان، بە هەموو رەنگەكانییەوە بكەنەوە، كە وا نەبوو و (رەبایەكە) نەگیرا، خۆ دەبوایە دەمڕاستان زامەكانی شكست سارێژ بكەن و برینەكان نەكولێننەوە،  كەچی خوێن و خوێیان پێدا كرد، چونكە مەبەستیان حەفلەكەی لق و عید میلادەكەی ناوچە و شەوە ئاهەنگی زێرەڤانی بوو.

مێژوو ئەمانەش دەنووسێتەوە و هەروا دەنووسێت كە نەوەكانی داهاتوو كڵاو ناچێتە سەریان و سێڵڤی دوای ریفراندۆمیش دەبینن کە خۆ دەچەمێننەوە و هیچ ( خۆڕاگر) نین.

PUKMEDIA