تەلار لەتیف: ناسنامە بۆ ئەندامانی جێگیری پێنجەمین کۆنگرەی یەکێتی دەکرێت

PUKMEDIA

تەلار لەتیف

ئامادەکارییەکان بۆ بەستنی پێنجەمین کۆنگرەی یەکێتیی نیشتمانیی کوردستان لە 27ی 9ی ئەمساڵ بەردەوامە کە لە شاری سلێمانی دەبێت و هەفتەی داهاتووش رێنمایی بۆ کۆنفرانسی مەکتەب و ئۆرگانەکان بڵاودەکرێتەوە.

ناسنامە بۆ ئەندامەکانی کۆنگرە دروست دەکرێت

تەلار لەتیف وتەبێژی تایبەت بە کاروبارەکانی پێنجەمین کۆنگرەی یەکێتیی نیشتمانیی کوردستان بە PUKMEDIA ی راگەیاند: "ئامادەکاری بۆ بەستنی پێنجەمین کۆنگرەی یەکێتی بەردەوامە و فۆڕم بۆ دروستکردنی ناسنامەی کۆنگرە بۆ ئەو ئەندامانە دروست دەکرێت کە جێگیرن، وەک ئەندامانی سەرکردایەتی و ئەنجومەنی بەرژەوەندی باڵا و پێشمەرگە دێرینەکانی ساڵی 1976".

"لە هەفتەی داهاتوودا رێنماییەکان بۆ کۆنفرانسی مەکتەب و مەڵبەند و ئۆرگانەکانی یەکێتی بەپێی رێنمایی و میکانیزمی کارپێکراوی پەیڕە و بڵاودەکرێتەوە"، تەلار لەتیف وادەڵێت.

گۆڕانکاری لە پێکهاتەی یەکێتی دا دەکرێت

وتەبێژی تایبەت بە کاروبارەکانی کۆنگرە دەڵێت: "لە کۆنگرەی ئەمجارەدا پەیڕەو و پرۆگرامی یەکێتی هەموار دەکرێتەوە و جیاواز لە کۆنگرەی پێشوو، بە دەنگی ئەندامانی کۆنگرە پەسەند دەکرێت و گۆڕانکاریش لە پێکهاتەی یەکێتی دا دەکرێت".

تەلار لەتیف تەئکیدیکردەوە: "یەکێتی هەمیشە کاری لەسەر نوێبوونەوە و بەهێزترکردنی حزب کردووەتەوە و بۆ ئەوەش پشتی بە توانای گەنجان و ژنان بەستووە و لەم کۆنگرەیەشدا بە هەمان شێوە گەنجان و ژنان بەشداری کارایان دەبێت لە کۆنگرە و ئۆرگانەکاندا".

وتیشی: "یەکێتی بە یەک هێزی و یەک دەنگی کاردەکات بۆ بەدیهێنانی ئامانجە باڵاکان کە هاوتەریبی خواستی کۆمەڵانی خەڵکی کوردستان بێت و روونیشیکردەوە کە کۆنگرە لە شاری سلێمانی دەبێت".

وتەبێژەکەی پێنجەمین کۆنگرەی یەکێتی ئاماژەی بەوەشدا: "بۆ کۆنگرە 600 ئەندام بەشدار دەبن".
PUKMEDIA