بودجەی سێ ساڵی هەرێم و بەغدا پەسندكرا

PUKMEDIA

دانیشتنی ئەنجومەنی نوێنەرانی عیراق بۆ دەنگدان لەسەر پرۆژە یاسای بودجە

پرۆژە یاسای بودجەی عیراق بۆ ئەمساڵ و دوو ساڵی داهاتوو لە ئەنجومەنی نوێنەرانی عیراق پەسندكرا، كە بۆ هەر ساڵێك 199 ترلیۆن دینارە و بەشی هەرێمیش دەگاتە نزیکەی 20 ترلیۆن زیاتر.

ئەنجومەنی نوێنەرانی عیراق لە دانیشتنی ژمارەی 31 دا كە تا بەرەبەیانی 12/6/2023ی خایاند، پرۆژەیاسای بودجەی عیراق بەگشتی پەسندكرا، كە لە 68 ماددە پێكهاتووە، دواتر دەخرێتە بەردەست د.لەتیف رەشید بۆ پەسند و ئیمزاكردنی.

بە گوێرەی پرۆژەیاساكە كە بۆ ساڵەكانی (2023، 2024 و 2025)ە، بڕی ئەو پارەیەی كە بۆ بودجە  بۆهەر ساڵێك  نزیكەی 199 تریلیۆن دینار تەرخانكراوە و بەشی هەرێمی كوردستانیش  18 تریلیۆن دینار زیاتر دەبێت.

پرۆژەکە دوای ٥ رۆژ دانیشتن پەسەندکرا

گفتوگۆی نوێنەرانی عیراق لەسەر پرۆژەكە لە 7/6ەوە دەستیپێكرد و دوای 5 رۆژ دانیشتی پەرلەمان، پەسندكرا، بەوتەی د.بریار رەشید پەرلەمانتاری عیراق لە فراكسیۆنی یەكێتی، کە بە سایتی رەسمی یەكێتیی نیشتمانیی كوردستان PUKMEDIAی راگەیاند:" پرۆژەكە دوای دەنگدانی ماددەكان و  زیادكردنی چەند ماددەیەك، بەگشتی پەسندكرا". 

پرۆژەیاساكە كە بەگشتی پەسندكرا، رەوانەی سەرۆكایەتی كۆماردەكرێت و دوای ئەوەی د.لەتیف رەشید سەرۆككۆمار پەسند و ئیمزای دەكات، دەینێرێت بۆ رۆژنامەی وەقائیعی عیراق و كە بڵاوكرایەوە، دەكەوێتە بواری جێبەجێكردنەوە. 

لەو پرۆژەیاسایەدا جێگیركراوە هەرێمی كوردستان رۆژانە 400 هەزار بەرمیل نەوت رادەستی كۆمپانیای سۆمۆ بكات و شایستەی دارایی كۆمپانیاكانی بەرهەمهێنانی نەوتی هەرێمیش بكەوێتە ئەستۆی حكومەتی  عیراق.

بەهەوڵی یەکێتی چەندین ماددە و بڕگە لە سوودی هەرێم جێگیركران

بەهەوڵی فراكسیۆنی یەكێتی ماددەی 14 لە پرۆژەیاساكەدا جێگیركرا، كە بڕگەی (نارازی) تێدایە، تاوەكو رێگری بكرێت كە نایەكسانی و نادادپەروەری لە نێوان پارێزگاكانی هەرێم بكرێت ، سەرباری ئەوەش چەندین ماددە و بڕگە لە سوودی هەرێمی كوردستان جێگیركران.

د.بڕیار رەشیدی پەرلەمانتار دەڵێت:" فراكسیۆنی یەكێتی دەنگماندا بە (لابردنی) ماددەی ٤۲، كە تایبەت بوو بە دانانی باج لەسەر سوتەمەنی، لەگەڵ لادانی سەپاندنی زەریبەی ٢٥ هەزار دینار بۆ هەر كەسێك لە فرۆكەخانەكانەوە سەفەر  بكات  ".

" بڕگەی گرێبەستی كارمەندانی هەڵبژاردن كە بكرێنە تەشغیلی لە بودجەكە جێگیركرا و دەنگمان پێدا، هەرلەسەرەتاوە فراكسیۆنی یەكێتی كاری جددی بۆكرد و بەڵێنەكەشی بردەسەر و زۆر بڕگەو ماددەی تر بەهەوڵی فراكسیۆنی یەكێتی جێگیركران  و بەسوودی خەڵك كارمان كردوە". د.بریار وایوت.

یەکێتی کاری جددی بۆ گێڕانەوەی پاشەکەوتی مووچە کرد 

دانیشتنی ژمارەی 31ی ئەم خولەی ئەنجومەنی نوێنەرانی عیراق بە ئامادەبوونی 229 پەرلەمانتار و بە سەرۆكایەتی محەممەد حەلبووسی، بەرێوەچوو، بەڵام "گێرانەوەی پاشەكەوتی مووچەخۆرانی هەرێم" پەسند نەكرا.

فراكسیۆنی یەكێتی لە نوێنەران كاری جددی كرد بۆ گێڕانەوەی رێژی 10 بۆ 12%ی پاشەكەوتی مووچەخۆران، بۆ ئەوەش ئیمزای 50 پەرلەمانتاری كۆكردەوە و دواتریش بۆ زیادكردنی رێژەكە ئیمزای دیكەی كۆكردەوە، ئەمە لە كاتێكدا بوو كە فراكسیۆنی نەوەی نوێ و پارتی دیموكراتی كوردستان لە دژی وەستانەوە بەتایبەت ماددەی 14 و گێڕانەوەی پاشەكەوت.

كاروان یاروەیس ئەندامی ئەنجومەنی نوێنەران بە PUKMEDIAی وت:" فراكسیۆنی یەكێتی هەوڵی زۆریدا تاوەكو پاشەكەوتی مووچەی فەرمانبەرانی هەرێم بگێڕدرێتەوە و هەم بۆ جێگیركردنی بڕگەی پاشەكەوت و هەمیش بۆ زیادكردنی رێژەكەی بە دوو لیستی جیا ئیمزای كۆكردەوە، بەڵام دەنگی نەهێنا".

"دەنگمان بە ماددەی ٤٢ نەدا  كە تایبەت بوو بە دانانی باج لەسەر بەرھەمی سوتەمەنی و سوتەمەنی ھاوردەكراو و چەند بڕگەیەكی دیكەش كە تایبەت بوون بە باجدان رەتكرانەوە و دەنگمان پێنەدا، چونكە دەبوونە بارگرانی لەسەر شانی هاووڵاتیان" كاروان یاروەیس وادەڵێت.

PUKMEDIA