بڕیاردەری ئەنجومەنی کۆمسیاران: بەشداری کۆبوونەوەکانی کۆمسیۆن ناکەم

PUKMEDIA

ئیسماعیل حەمەعەلی خورماڵی بڕیاردەری ئەنجومەنی كۆمسیاران

لە روونکردنەوەیەکدا ئیسماعیل حەمەعەلی خورماڵی بڕیاردەری ئەنجومەنی كۆمسیاران هەڵوێستی خۆی لەبارەی کاراکردنەوەی کۆمسیۆن راگەیاند و ئاماژە بەوەدەکات، "دوور لە لایەنگیری یان دژایەتی هیچ كەس و لایەنێك رایدەگەیەنم لە ئێستا و داهاتوودا بەشداری هیچ كار و چالاكی و كۆبونەوەیەكی کۆمسیۆن ناكەم كە تێبینی و رەخنەی یاسایی لەسەر بێت و لە كەشێكی ئارام و تەندروستدا نەبێت".

دەقی روونکردنەوەکەی بڕیاردەری ئەنجومەنی کۆمسیاران

ڕونكردنەوەیەك بۆ ڕای گشتی
بەناوی خوای بەخشندەی میهرەبان

لە ماوەی هەشت ساڵ و نیو كاری كۆمسیاری لە كۆمسیۆنی باڵای سەربەخۆی هەڵبژاردن و ڕاپرسی، هەمیشە كار و چالاكی و هەڵوێستەكانم بە شێوەیەكی پیشەیی و ئەرێنی بووە. لەو ماوەیەدا چەندینجار ئەوەم ڕاگەیاندووە كە بەشداری هیچ كار و چالاكی و كۆبونەوەیەك ناكەم كە هۆكار بێت بۆ لێكترازان و كاریگەری نەرێنی هەبێت لەسەر پێگەی كۆمسیۆن و دژ بێت بە ئاشتەوایی و بێلایەنی و ئارامی سیاسی كوردستان بشێوێنێت.

سەبارەت بە نوێكردنەوەی كۆمسیۆن لە پەرلەمانی كوردستان لە بەرواری 22/5/2023 بەدەر لەو تێبینی و ڕەخنە یاساییانەی كە هەبووە و هەیە لەسەر پرۆسەكە، بەگشتی بە حاڵەتێكی نا تەندروستی دەبینم و وادەزانم خزمەت بەو قەناعەت و مەبدەئەی كاری بەردەوامی من ناكات.

لەو سۆنگەیەوە وەك هەڵوێستێكی مەبدەئی و دوور لە لایەنگیری یان دژایەتی هیچ كەس و لایەنێك ڕایدەگەیەنم كە بەشداری هیچ كار و چالاكی و كۆبونەوەیەك ناكەم لە ئێستا و لە داهاتوودا كە تێبینی و ڕەخنەی یاسایی لەسەر بێت و لە كەشێكی ئارام و تەندروستدا نەبێت و خزمەت بە كۆی پرۆسەی سیاسی كوردستان و ئاشتەوایی و یەكڕیزی و پێكەوەژیان نەكات لەكوردستان.

ئیسماعیل حمەعلی خورماڵی
بڕیاردەری ئەنجومەنی كۆمسیاران
27/5/2023