کوردێک لە بەریتانیا 30 کەس لە مردن رزگار دەکات

PUKMEDIA

کوردێک لە بەریتانیا 30 کەس لە مردن رزگار دەکات

کوردێکی دانیشتویی بەریتانیا لە رووداوێکی ئاگرکەوتنەوەدا نزیکەی 30 کەس رزگار دەکات و ئەمەش دەبێتە جێگای سەرنجی راگەیاندنەکانی بەریتانیا و وەکخۆشی دەڵێت: "تەنها هەستی مرۆڤایەتی و بەرپرسیارێتیی هۆکار بووە کە گیانی خۆی بخاتە مەترسییەوە".

سەروەر مەحمود ئەو کوردەی لە بەریتانیا بەدەم روداوەکەوە چووە بە سایتی رەسمی یەکێتیی نیشتمانیی کوردستان PUKMEDIA ی راگەیاند: "هەستی بەرپرسیارێتی و مرۆڤایەتی هۆکار بوو کە گیانی خۆم بخەمە مەترسییەوەو دوای ئاگاداربوون لە رووداوەکە بەتەنیا بەدەم سەرجەم دانیشتوانی شوێنی رووداوەکەوە بچم".

"رۆژی 4 شەممە 17-5-2023 سەعات 9ی شەو لە دوکانێک و چەند شوقەیەکی سەرو دوکانە لە شاری رێکسامی باکوری وێڵزی بەریتانیا روداوێکی ئاگرکەوتنەوە روویدا و بەهۆی ئەوەی درەنگانی شەووبووە، کەس ئاگادار نەبوو، كاتێك هەستم بەبۆن و دوکەڵی ئاگرەکە كرد بەدەم رووداوەکەوە چووم"، سەروەر محەمەد وایوت.

سەروەر كوڕی تێكۆشەر و پێشمەرگەیەكی دێرینی یەكێتییە كە ناوی مەحمود مورادە، باوكی سەروەر هەموو ژیانی خۆی بۆ خەباتی رزگاری گەلەكەی تەرخان كردبوو، خەڵكی ناوچەی كەلارە، بۆ ئەو رووداوەی بەریتانیاش بەرلە تیمەكانی ئاگركوژێنەوە و فریاكەوتن، توانی ژیانی 30 كەس لە مردن رزگار بكات.

سەروەر دەڵێت: "دەستبەجێ خۆم گەیاندە ماڵەکان و بەبانگکردن و لەدەرگادان خەبەرم کردنەوەو نزیکەی 30 کەسم لەو روداوە رزگار کرد، کە ژن و مناڵ و پیر و گەنجیشی تێدا بوو، دواتریش تیمەکانی فریاگوزاری و ئاگرکوژێنەوە گەیشتنە شوێنی روداوەکە".

سەروەر مەحمود کوردێکی دانیشتوی بەریتانیایە ماوەی 15 ساڵە لە بەریتانیا دەژی و رەگەزنامەی بەریتانی هەیە و خاوەن دوکانە، بەهۆی ئەو کارە مرۆڤانەیەوە کە کردویەتی بووەتە جێی سەرنجی راگەیاندنەکانی بەریتانیا.

كارە فریاگوزارییەكەی سەروەر مەحموود لە راگەیاندنەكانی بەریتانیا بایەخی زۆری پێدرا؛ لەوانە رۆژنامەی زە لیدەری وێڵزی  هەواڵی ئەو رووداوە و رزگاركردنی خەڵكەكەی لەلایەن سەروەرەوە بە گرنگیپێدانەوە بڵاوكردۆتەوە  كە لە یەكێك لە باڵەخانەكانی شەقامی کینگ لە رێخسامی هەرێمی وێڵزی بەریتانیا کەوتەوە  نوسیویەتی:"  سەروەر مەحموود ژیانی خۆی خستە مەترسییەوە و ژمارەیەک ژن و منداڵی لە نێو ئاگر و دووکەڵی باڵەخانەکە رزگارکرد".
 
PUKMEDIA