لەتیف نێروەیی: پارتی نایەوێت هەڵبژاردن بکرێت

PUKMEDIA

لەتیف نێروەیی

پارتی دیموکراتی کوردستان لە بەڵێنەکانی بۆ ئەنجامدانی هەڵبژاردن پەشیمان بووەتەوە و وادیارە نایەوێت هەڵبژاردن ئەنجام بدرێت، لێپرسراوی بۆردی هەماهەنگی و بەدواداچوون لە دەزگای هەڵبژاردنیش دەڵێت، " ئەوەی لەئێستای پارتی دەبیندرێت تەواو پێچەوانەی رێککەوتنی دەزگای هەڵبژاردنی یەکێتی و مەکتەبی هەڵبژاردنی پارتییە".

 لەتیف نێروەیی لێپرسراوی بۆردی هەماهەنگی و بەدواداچوون لە دەزگای هەڵبژاردن بە سایتی رەسمی یەکێتیی نیشتمانیی کوردستان PUKMEDIA ی راگەیاند: "پارتی دیموکراتی کوردستان پاشگەز بووەتەوە لە ئەنجامدانی هەڵبژاردن و هەموو ئەو رێکەوتنانەی کە لەبارەی هەڵبژاردنەوە لەگەڵ لایەنەکان بەگشتی و یەکێتی بەتایبەت کردبووی، پاشگەزبوونەوەی پێوەدیارە و گەرموگوڕ نییە لە جێبەجێکردنی بەڵێنەکانی".

"پارتی تەنانەت پێشنیاری نەتەوە یەکگرتووەکانیشی لەبارەی کورسی پێکهاتەکان رەت کردووەتەوە و پێی باش نییە کورسی پێکهاتەکان بەسەر بازنەکانی هەڵبژاردندا دابەش بکرێن، بۆئەوەی پێکهاتەی سەرجەم شارەکانی هەرێمی کوردستان دەنگ و رەنگی خۆیان لە پەرلەمان هەبێت"، لەتیف نێروەیی وادەڵێت.

وتیشی:"لەگەڵ ئەوەی لە کۆبوونەوەکانی دەزگای هەڵبژاردنی یەکێتی و مەکتەبی هەڵبژاردنی پارتی پرسی تۆماری دەنگدەران و چوار بازنەیی هەڵبژاردن و کاراکردنەوەی کۆمسیۆن یەکلابووبوەوە، بەڵام ئەوەی لەئێستای پارتی دەبیندرێت تەواو پێچەوانەی رێککەوتنی دەزگای هەڵبژاردنی یەکێتی و مەکتەبی هەڵبژاردنی پارتییە، لەمەشەوە بۆمان دەردەکەوێت بەشێوەیەک لە شێوەکان پارتی پاشگەز بووەتەوە لە ئەنجامدانی هەڵبژاردن".
PUKMEDIA