نوێنەرایەتی هەدەپە: بەهاوکاری لایەنێک لەهەرێم تیرۆرکردنمان زیادیکردووە

PUKMEDIA

کۆنگرەی رۆژنامەوانی نوێنەرایەتی پارتی دیموکراتی گەلان (هەدەپە)

نوێنەرایەتی هەدەپە: میت سیاسەتی لەناوبردمان لە هەرێم پەیڕەو دەکات

نوێنەرایەتی پارتی دیموکراتی گەلان (هەدەپە) لەبارەی تیرۆرکردنی ئەندامێکیان لە دهۆک رایانگەیاند، "دەزانین ئەم هێرشە سیاسەتی میتە بۆ لەناوبردن و هەڕەشەکردن لەپەنابەرە سیاسییەکان و لەم کۆتاییانەشدا بە هاوکاری لایەنێک لەهەرێمی کوردستان هێرشکردنە سەرمان زیادیکردووە".

نوێنەرایەتی پارتی دیموکراتی گەلان (هەدەپە) لەبارەی تیرۆرکردنی ئەندامێکیان لەلایەن میتی تورکی لە دهۆک لە کۆنگرەیەکی رۆژنامەوانیدا رایانگەیاند: " دوێنێ دوو شەممە 17-4-2023، لە شاری دهۆک هاوڕێمان حسێن تویرانی لەناو کارگەکەی خۆیدا لەلایەن میتی تورکیەوە تیرۆرکراوە، ئەمە لەکاتێکدایە ساڵی پاریش هێرشێکی چەکداری بۆسەر هەمان کەس ئەنجامدراو بریندارکرا".

بە هاوکاری لایەنێک لەهەرێمی کوردستان هێرشەکان زیادیان کردووە

دەشڵێن: "ئێمەش دەزانین ئەم هێرشە سیاسەتی میتە بۆ لەناوبردن و هەڕەشەکردن لەپەنابەرە سیاسییەکان، باش دەزانین کە بکوژی هاوڕێکانمان ئەکەپە و مەهەپە و دەسەڵاتی ئەردۆغانن، ئەم هێرشانە شەرمەزار دەکەین، داوا دەکەین بەرپرسیارانی ئەم هێرشانە دەستگیربکرێن و بە دادپەروەرانە دادگایی بکرێن و ئەم  هێرشانە کۆتایی پێ بهێنرێت".

ئەوەش دەڵێن: "بەشێکی گەورە لەو کەسانەی کە ئاوارەی کوردستان بوون سیاسەتمەدارانی باکوری کوردستانن، بەژیانێکی سەختدا تێدەپەڕن، لەم کۆتاییانەشدا بە هاوکاری لایەنێک لەهەرێمی کوردستان هێرشکردنە سەریان زیادیکردووە".

"لە چوارچێوەی ئەم رووداوانەشدا پەیامی ئێمە ئەوەیە کە هەر هێزێک پێیوایە ئێمە بەزیندانی کردن و کوشتن  و سەرکۆنە بێدەنگ دەبین، با باش بزانن ئێمە تا دوا نەفەس لەدژی دوژمنانی کورد دەجەنگین، سەری خۆمان بۆ کارە تیرۆریەکان و هەڕەشەکانیان دانانەوێنین"، نوێنەرایەتی پارتی دیموکراتی گەلان وادەڵێت.
PUKMEDIA