ئەمین بابە شێخ: هەولێرو بەغدا چارەنوسی ئێزدییە رفێنراوەكان ئاشكرا بكەن

ئەمین بابە شێخ ئەندامی مەكتەبی سیاسی یەكێتیی نیشتمانیی كوردستان بۆ یادی هەشتەمین ساڵەی جینۆسایدی كوردانی ئێزیدی داوا لەحكومەتی فیدڕاڵ و حكومەتی هەرێمی كوردستان دەكات دادپەروەری بەرامبەر قوربانییەكان بكرێت و قەرەبوییان بكەنەوەو هەروەها گەڕان بەدوای چارەنوسی رفێنراوانی كوردانی ئێزدی و ئاشكراكردنیان.
ئەمین بابە شێخ ئەمڕۆ 2-8-2022 راگەیەنراوێكی بڵاوكردەوەو دەڵێت: ئەمڕۆ یادی هەشتەمین ساڵەی جینۆسایدی ئێزدییەكان دەكەینەوە كە تێیدا هەزاران هاووڵاتی مەدەنی لەپێكهاتەی ئێزدی لەناوچەی شەنگالی سەر بەپارێزگای نەینەوا لەلایەن تیرۆرستانی داعشەوە لەكاتی داگیركردنی ناوچەی شەنگال لە رۆژی 3ی ئابی 2014 كوژران و رفێنران و بەكەنیزەك كران.
 راشیگەیاند: لەوكاتەوە پێكهاتەی ئێزدی و پێكهاتەكانی دیكە لەناوچەكەدا بەدەست دۆسیەی گەڕانەوەی ئاوارەكان و ئاوەدانكردنەوەو ئیدارەو ئاسایش و سەقامگیری ناوچەكەوە دەناڵێنن.
ئەو ئەندامەی مەكتەبی سیاسی یەكێتی راشیگەیاند: بەم بۆنەیەوە، داوا لەحكومەتی فیدڕاڵ لەبەغداو حكومەتی هەرێمی كوردستان لەهەولێر دەكەین دادپەروەربن لەبەرامبەر قوربانییەكان و قەرەبویان بكەنەوەو گەڕان بەدوای رفێنراوان و ئاشكراكردنی چارەنوسیان.
لەبەشێكی تری راگەیەنراوەكەیدا ئەمین بابە شێخ رایگەیاند: داوا دەكەین هەوڵی جدی بدرێت بۆ گەڕانەوەی ئاوارەكان و ئاوەدانكردنەوەی ناوچەی شەنگال و دوورخستنەوەی لەململانێیە سەربازییەكان و چارەسەركردنی كێشەكانیان بەڕێگەیەكی سیاسی و ئاشتییانەو رێگریكردن لەوەی پێكهاتەی ئێزدی و پرسە رەواكەیان لەململانێیە نامرۆڤایەتی و نادەستوورییەكاندا بەكاربهێنرێت، داواش لەكۆمەڵگەی نێودەوڵەتی دەكات هاوكاری پێكهاتەی ئێزدی و سەرجەم پێكهاتەكانی دیكە لەعیراق بكەن.
 PUKmedia