ئێزیدییەكان داوای گەڕانەوەی هاوكاری حكومەتی عیراق بۆ ئاوارەكانی شەنگال دەكەن

ئەندامێكی ئەنجومەنی نوێنەران رایدەگەیەنێت:  بڕینی هاوكاری ئاوارەكان بۆ ئەوەی ناچاربكرێن بگەڕێنەوە ناوچەكانیان، غەدرێكی ترە لە ئێزیدییەكانی شەنگال دەكرێت، ئاماژە بەوەش دەكات ئاوارەكان پێویستیان بە بەردەوامی ئەو هاوكاریانەی حكومەتی عیراق و رێكخراوە نێودەوڵەتییەكان هەیە، تاكو بەشێك لە برینەكانیان سارێژبكرێت كە لەساڵی 2014 بەسەریاندا هات. 
رۆنزی زیاد ئەندامی ئەنجومەنی نوێنەرانی عیراق لە پێكهاتەی ئێزیدی بە PUKmedia ی راگەیاند: ئێمە لە بڕیارێكی حكومەتی عیراقی زۆر نیگەران، ئەویش بڕینی هاوكارییەكانە بۆ ئاوەرەكان و خەڵكی ناوكەمپەكان، كەبەشێكی زۆریان لە خەڵكی شەنگال و ئێزیدی پێكدێن.
وتیشی:  بەهۆی ئەو بڕیارەی حكومەتی عیراقی و راگرتنی هاوكاری رێكخراوە نێودەوڵەتیەكانەوە، وایكردوە ئاوارەكان لە بارودۆخێكی سەختدا بژین و رووبەروی برسێتی و  نەهانەتی گەورە ببنەوە، بەتایبەتی لەم وەزە هاوینە، بۆیە ئێمە لەپەرلەمان بێدەنگ نابین.
ئەو پەرلەمانتارە ئاموژەی بەوەشكرد: ناڕەزایی ئێمە لەخراپی دۆخی ئاوارەكان،  هاوكاتە لەگەڵ هەشتەمین ساڵیادی قەتلوعامكردن  ئێزیدییەكان و خاپوركردنی شاروگوندەكانی شەنگال لەسەر دەستی رێكخراوی تیرۆرستی داعش، كاتێك لە3/8/2014هێرشێكی فراوانی بۆ ناوچەكە ئەنجامدا.
رۆنزی زیاد تەئكیدیكردەوە: دەبوو حكومەتی عیراقی فیدراڵ لەجیاتی بڕینی هاوكاری بۆ ئاوارەكان، كار بۆ باشتركردنی ژیان و گوزەرانیان بكات و هەوڵی گەڕانەوە بۆ شوێنی خۆیان و چارەسەركردنی رزگاربوانی دەستی داعش بدات، كەتاكو ئێستا زیاتر لە 2هەزار لەخەڵكی شەنگال لەژێر دەستی ئەو تیرۆرستانە ماون و ئازاد نەكراون.
PUKmedia تەها عەبدوڵڵا