پسپۆڕێك داوا لەتوشبووانی ئۆمیكرۆن دەكات راهێنان لەسەر هەستی بۆنكردن بكەن

پسپۆڕێكی بواری تەندروستی روونیكردەوە كە گۆڕاوی ئۆمیكرۆن یاری بەهەستی بۆنكردن لەلای كەسی توشبوو دەكات و پێویستە راهێنان لەسەر هەستی بۆنكردن بكرێت.

دكتۆری دەرمانساز ئوسامە عانی توێژەر لەبواری پەتای كۆرۆنا ئەمڕۆ یەكشەممە بە PUKmediaی راگەیاند: ئەنجامی توێژینەوە نوێیەكان دەریانخست كە گۆڕاوی نوێی ئۆمیكرۆن یاری بەهەستی بۆنكردن لەلای كەسی توشبوو دەكات، ئاماژەشیدا بەزۆری لەدەستدانی هەستی بۆنكردن لەنیشانەكانی توشبوون بەئۆمیكرۆن دەبێت.

وتیشی: ئەوەی جێی دڵخۆشییە توندی نیشانەكانی توشبوون بەگۆڕاوی ئۆمیكرۆنی نوێ لەوەی جاری پێشوو كەمترە.

ئاماژەی بەوەشدا: دەتوانین بەئاسانی و بەخێراییەكەی زۆرتر هەستی بۆنكردن بگەڕێنینەوە، داواش دەكات لەگەڵ گۆڕاوە نوێیەكەدا راهێنان لەسەر هەستی بۆنكردن بكرێت لەڕێگەی بۆنكردنی بۆنی رووەكە سروشتییەكانەوەو بەشێوەیەكی بەردەوام وەك (قاوە، لیمۆ، نەعنا و ڤانێلا) و چەندین بۆنی ترەوە.

PUKmedia تایبەت