وەزیری تەندروستی: 96 كارمەند و پزیشك بەهۆی كۆرۆناوە گیانیان لەدەستداوە

وەزیری تەندروستی حكومەتی هەرێمی كوردستان ڕایگەیاند: لەكاتی سەرهەڵدانی كۆرۆناوە تا ئێستا 96 پزیشك و كارمەندی وەزارەتی تەندروستی بەهۆی كۆرۆناوە گیانیان لەدەستداوە.

ئەمڕۆ چوارشەممە 27-7-2022 بە ئامادەبوونی سامان بەرزنجی وەزیری تەندروستی و د. ڕەهێڵ فەریدوون بریكاری وەزارەتی تەندروستی، د. هەڤاڵ ئەبوبكر پارێزگاری سلێمانی و د. سەباح هەورامی بەڕێوەبەری گشتی تەندروستی سلێمانی و كونسوڵی ئەڵمانیا نەخۆشخانەی ئەڵمانی تایبەت بە كۆرۆنا لە سلێمانی كرایەوە.

 لە كۆنفرانسێكی ڕۆژنامەوانیدا د. سەباح هەورامی بەڕێوەبەری گشتی تەندروستی سلێمانی ڕایگەیاند: كردنەوەی ئەو نەخۆشخانەیە بۆ سلێمانی وەك ڕۆژێكی مێژوویی وایە و دانیشتوانی پارێزگای سلێمانی بوونە خاوەن نەخۆشخانەیەكی مۆدێرن و لێرە سوپاسی گەلی ئەڵمانیا دەكەین بۆ ئەو دیاری و هاوكارییە جوانە.

سەباح هەورامی سەبارەت بە نەخۆشخانەی ئەڵمانی تایبەت بۆ كۆرۆنا لە سلێمانی وتیشی: نەخۆشخانەكە لەباری كوالێتییەوە لە ئاستێكی بەرز دایە و توانای وەرگرتنی 100 نەخۆشی هەیە و وەزیری تەندروستی بەڵێنی داوە ژمارەیەك لەو خۆبەخشانەی كە لە كاتی كۆرۆنا خزمەتیان كردووە لەو نەخۆشخانەیە دابمەزرێنێت.

 دواتروەزیری تەندروستی هەرێمی كوردستان  لە كۆنفرانسەكەدا ڕایگەیاند: لە سەرەتای سەرهەڵدانی كۆرۆناوە تا ئێستا 96 كارمەند و پزیشكی كەرتی تەندروستی بەهۆی كۆرۆناوە گیانیان لەدەستداوە.

سەبارەت بە دەرمان و نەخۆشی شێرپەنجە وتیشی: 60% ئەو منداڵانەی لە نەخۆشخانەكانی شێرپەنجە چارەسەر وەردەگرن هی هەرێم نییە و لەناوچەكانی باشوور و ناوەڕاستی عیراق هاتوون و نەخۆشخانەی هیوا بەبێ هیچ جیاوازییەكی ڕەگەزی و نەتەوەیی و ئایینی نەخۆشەكان چارەسەر دەكات و بودجەی وەزارەتی تەندروستی لە شەش ملیارەوە كراوە بە حەوت ملیار و ناهێڵین بەهیچ شێوەیەك خزمەتگوازییە پزیشكییەكان پەكی بكەوێت. 
PUKmedia تایبەت