پسپۆڕێكی تەندروستی ماكەكانی توشبوون بەگۆڕاوی BA5 رووندەكاتەوە

ئوسامە ئەلعانی پزیشكی دەرمانساز و توێژەر لەبواری پەتای كۆرۆنا ئەمڕۆ یەك شەممە جەختیكردەوە پەتای كۆرۆنا بەشێوەیەكی فراوان لەسەرانسەری عیراقدا بڵاوبووەتەوە.

ئەلعانی لەمیانی لێدوانێكدا لەگەڵ PUKmedia باسی لەوەشكرد: لەكاتی دەركەوتنی نیشانەكانی توشبوون بە نەخۆشییەكە پێویستە كەسی توشبوو خۆی كەرەنتین بكات و تێكەڵی كەسی تر نەبێت بۆ رێگریكردن لە بڵاوبوونەوە و گواستنەوەی ڤایرۆسەكە.

عانی وتیشی: توشبوونەكە بەگۆڕاوی نوێی BA5 سووكە و لەناو قوڕگدا دەوەستێت دانابەزێتە نێو سییەكانەوە، بەڵام هاوكات ماندووكەر دەبێت بەهۆی بەرزبوونەوەی پلەی گەرمای جەستە و سستی و هەستكردن بەماندوێتی و لاوازی و سەرئێشە و ئازاری خواروو پشتەوە.

ئاماژەی بەوەشدا: نەخۆشییەكە چەندین ماكی هەیە و ئەگەریشی هەیە ماكی هەراسانكەری زیاتر بەجێبهێڵێت، بەشێك یاخود تەواوی هەستی بۆنكردن لەدەستبدات، لەگەڵ ماندووێتی و سەرئێشەی بەردەوام كە هەندێك جار بۆ ماوەی مانگێكی تەواو دەمێنێتەوە، هەروەها ئارەقكردنەوە و بیرچوونەوە و كەمی تەركیز لەماكەكانی تری نەخۆشییەكەیە.

PUKmedia تایبەت