ئه‌گه‌ر ئه‌م نیشانانه‌ت هه‌یه‌ پشكینینی ڤیتامین D ئه‌نجامبده‌

ڤیتامین ( D ) یه‌كێكه‌ له‌و ڤیتامینانه‌ی كه‌ پێویسته‌ بۆ مژینی كالسیۆم له‌ له‌شدا وه‌ كالیسیۆمیش وه‌ك دیاره‌ گرنگیه‌كی زۆری هه‌یه‌ له‌ پته‌وی و به‌هێزی ئێسكه‌كان و ڕێگر ده‌بێت له‌ پوكانه‌وه‌ و ئازاری ئێسكه‌كان ، به‌پێی پشكنین له‌ تاقیگه‌دا بۆمان ده‌رده‌كه‌وێت كه‌ ئایا ڤیتامین ( D ) كه‌مه‌ له‌ جه‌سته‌مان یاخود نا بۆیه‌ پێویسته‌ ڕێژه‌ی ئاسایی ڤیتامین ( D ) بزانین كه‌ به‌م شێوه‌یه‌ خه‌مڵێنراوه‌  :
- ئه‌گه‌ر له‌ پشكنیندا ده‌ركه‌وت كه‌ ڕێژه‌ی ڤیتامین ( D ) كه‌متره‌ له‌ ( 10 ) ئه‌وا مانای وایه‌ كه‌ ڤیتامین ( D ) له‌ جه‌سته‌دا كه‌مه‌ و پێویسته‌ زیاد بكرێت. 
- ئه‌گه‌ر له‌ پشكنیندا ده‌ركه‌وت كه‌ ڕێژه‌ی ڤیتامین ( D ) كه‌وتۆته‌ نێوان ( 10-20 ) مانای وانیه‌ كه‌ ڕێژه‌یه‌كی كه‌مه‌، به‌ڵام له‌هه‌مان كاتدا ئه‌م ڕێژه‌یه‌ به‌شی ئه‌نجامدانی مژینی كالسیۆمی پێویست ناكات بۆ ئێسكه‌كان. 
- ئه‌گه‌ر له‌ پشكنیندا ده‌ركه‌وت كه‌ ڕێژه‌ی ڤیتامین ( D ) زیاتره‌ له‌ ( 20 ) واته‌ كه‌وتبێته‌ نێوان ( 20-80 ) ئه‌وا مانای وایه‌ ڤیتامین ( D ) له‌ جه‌سته‌تدا كێشه‌ی نیه‌ و به‌شی مژینی كالسیۆمی پێویست ده‌كات بۆ ئێسكه‌كان. 
به‌ڵام له‌هه‌مان كاتدا ئه‌گه‌ر هاتوو ڕێژه‌ی ڤیتامین ( D ) له‌ جه‌سته‌دا زۆر بوو واته‌ ڕێژه‌كه‌ی گه‌شته‌ سه‌روو ( 80 ) ئه‌وا زیانمان پێ ده‌گه‌یه‌نێت و تووشی ژه‌هراوی بوونمان ئه‌كات. 
ده‌توانین له‌ سێ ڕێگاوه‌ ڤیتامین ( D ) به‌ده‌ست بخه‌ین  :
1. له‌ ڕێگای ئه‌و خۆراكانه‌ی كه‌ ده‌وڵه‌مه‌ندن به‌ ڤیتامین ( D ) كه‌ ئه‌وانیش :
+ ماسی. 
+ په‌نیر و ماست. 
+ شه‌ربه‌تی پرته‌قاڵ. 
+ قارچك. 
+ زه‌ردێنه‌ی هێلكه‌. 
+ جگه‌ری حه‌یوان. 
2. ده‌كرێت له‌ ڕێگه‌ی خۆدانه‌ به‌ر تیشكی خۆر ڕێژه‌یه‌كی باشی ڤیتامین ( D )مان ده‌ستبكه‌وێت به‌ڵام بێگومان خۆدانه‌ به‌ر تیشكی خۆر به‌ڕێژه‌یه‌كی زۆر ئه‌ویش زیانی خۆی هه‌یه‌ و تووشی شێرپه‌نجه‌ی پێستمان ده‌كات. 
3. ئه‌گه‌ر نه‌مان توانی به‌ڕێگای ( 1 و 2 ) ڤیتامین ( D ) پێویستمان ده‌ستبكه‌وێت ئه‌و كاته‌ به‌شێوه‌ی ده‌رمان ڤیتامین ( D ) به‌كارده‌هێنین به‌ڵام ده‌بێت له‌ژێر ڕێنمایی پزیشك بێت. 
له‌دوای ئه‌م نیشانانه‌وه‌ پشكنین بۆ ڤیتامین ( D ) بكه‌ چونكه‌ بوونی ئه‌م نیشانانه‌ی خواره‌وه‌ به‌ ئه‌گه‌رێكی زۆره‌وه‌ پێمان ده‌ڵێن كه‌ ڤیتامین ( D )مان كه‌مه‌ له‌ جه‌سته‌دا ئه‌وانیش  :
1. لاوازی و بێتاقه‌تی ( Weakness ). 
2. ئازاری ماسوولكه‌ و ئێسك ( Muscle and Bone Pain ). 
3. ئازاری پشت ( Backache ). 
4. وه‌رینی قژ ( Alopecia ). 

PUKmedia ئاماده‌كردنی/ ژیار حسێن وسو / به‌كالۆریۆس له‌ كۆلێژی په‌رستاری