عەزیز گەردی پاشای زمان و وەرگێڕان

عەزیز گەردی، پاشای زمان و وەرگێڕان
1948- 2022

مخابن، كاتێك هەواڵی ژیانئاوایی عەزیز گەردییم بیست، فرمێسك تنۆك تنۆك لە چاوەكانم رێچكەی گرتبوو، لەو كاتەدا واتە سەرلەبەیانی 06-06-2022 كە هەواڵی كۆچی دوایی ناوبراو سۆشیال میدیای تەنیبوو ، ئەفسوس منیش بێ چارەو هەڵكوڕماو بەدیار هەواڵەكانی كوژانەوەی ئەستێرەیەكی پڕشنگدار لەنێو دنیای زمان و وەرگێڕان و ئەفسانەكاندا هەڵپە هەڵپی ئەوەم بوو، ئاخۆ دەتوانم بۆ چلەكەی كە دەكاتە 16-07- 2022كتێبێك شایان و شایەستە بە پێگەی پڕۆفیسۆر عەزیز گەردی ئامادەبكەم .

هەوڵمداو پەیوەندیم بە بنەماڵەكەیی و هاوڕێ نزیكەكانی زانكۆی موسڵ و ئەو بابەتانەی لە سوسیال میدیا بڵاوكراوەتەوە ،كۆیانبكەمەوە و هەرچی بەرگی كتێبە چاپكراوەكانییەتیی پەیدابكەم و بۆ  وێنەو دیكۆمێنتەكانیش پەیوەندیم بە زۆر كەسەوە كرد و بەسوپاسەوە لەلایەك نووسین و یادەوەرییەكانیان نووسی و لەلایەكدیكەشەوە وێنە و دەستنووسەكانیشم دەستكەوت، پاش راوێژكردن لەگەڵ قەهاری برای گەردی و جەلیلی نەخشەساز و باسم رەسامی دیزاینەر ،تواندرا لەكاتی ساتی خۆیدا بگاتە دەمەزراوەی كەریمی عەلەكە و د.تەها رەسوڵ بەسوپاسەوە لەسەر ئەركی خۆی چاپیكرد، كتێبەكە بەناوی عەزیز گەردی، پاشای زمان و وەرگێڕانە و 400 لاپەڕەی قەبارە17x24cm بە رەنكاوڕەنگی لە چاپخانەی پاندا لە سلێمانی چاپكراوە، كە لە بڵاوكراوەكانی ئەكادیمیای بەدرخان بۆ توێژینەوەی رۆژنامەوانی و كەلتوورە .

٭ عەزیز گەردییم چۆن ناسی؟
لە هەڕەتی لاوێتیمەوە، بەنووسینەكانی د.عەزیز گەردی و خوێندنەوەی ئەو نووسین و بڵاوكراوانەی چاپی دەكردن و ئەو كتێبانەشی كە وەریدەگێڕانە سەر زمانی كوردی بە تایبەتی داغستانی منی رەسوڵ حەمزاتۆڤ ئاشنا بووم ... تا ساڵی 2005،  كە یەكەمین دیدەنیم  لە كۆلێژی ئادابی زانكۆی سەلاحەدین لە هەولێر بوو،  ئەویش پرۆژەی كتێبێكم هەبوو سەبارەت بە شاری هەولێر، پاش چاك و چۆنی و ئەحواڵ پرسین،
گوتم : دكتۆر لە هەفتەنامەی بەدرخان لە هەر ژمارەیەك گەرەكێكی شاری هەولێر بەسەردەكەینەوە، ئایا تۆ بینیوتەو خوێندووتەوە، دەخوازم رای بەڕێزتان بزانم ؟
لەوەڵامدا گوتی: هەولێر شارێكی كۆنەو پێویستی بەگەڕان و پشكنین هەیە ، وەكو كاری شوێنەوار ، چونكە  سەرچاوەی پێویستیشی دەوێت بۆ پشت راسكردنەوەی نووسینەكانتان.

هەروەها پێیگوتم : پێویستە زۆر بخوێنیتەوەو باشتر وایە خۆت فێری زمانی ئینگلیزی بكەیت.

دیدەنی دووەمم لە پیشانگای كتێب لە هەولێر بوو ساڵی 2015، من بەتامەزرۆوە بەرەو رووی چووم و چاك و چۆنیەكی گەرمم لەگەڵی كرد، دەشترسام نەوەكو پەرچەكرداری خراپی هەبێ، چونكە وەڵامی زۆرێك لە نووسەرانی نەدەدایەوە،  ویستم خۆمی پێ بناسێنمەوە ، یەكسەر گوتی: حەمید ئەبوبەكر ئەحمەد، بێ ئەوەی بڵێ حەمید بەدرخان و هەڵیدایێ و گوتی: باش دەتناسم تۆ كێی و كوڕی كێی!
تۆ بەهەژاری و ماندووبوونێكی زۆر خۆت .. خۆت پێگەیاندووە و ئاگاداریشم زانكۆشت تەواوكردوە و سڵیشت لە هیچ نەكردۆتەوە  ، باوكیشت شوان جەلەب بوە ، بەغەریبی و فەقیری و هەژاری ئێوەی بەخێوكردووە ، باش دەزانم باوكتان مەڕی مەڕدارەكانی بە پێ  بۆ شارەكانی كەركوك و سلێمانی و موسڵ و بەغدا بردووە ، دوو مانگ یا سێ مانگ جارێك بە ماڵ كەوتۆتەوە ...لەسەری رۆیشت و گوتی : ئەوەشیان دەزانم باوكت كوڕی خوشكی لە بەغدایێ وەزیر بوە ، بەڵام نانی شوانەتی زۆر لای گەورەتربووە ، بۆیە لای من ژیانی باوكت شەریفانەتر و رێزلێگیراو بووە .

منیش چاوەكانم پڕ لە ئاو ببوون و خەریكبوو بگریێم ...دانم بەخۆدا گرت و هەڵمدایێ و گوتم :هەموومان شانازی بە باوكی رەوانشادمان دەكەین كە بۆ رۆژێ لە رۆژان ملكەچی كەس نەبووە و لە كەسیشی قبوڵنەكردوە، هەر لەبەر ئەو دەمارە پیاوەتیەی هەیبووە ، لە ساڵی 1947 لە گوندی مەلاكاغەی كەندێناوە لە خدری پاشای دزەیی توڕەدەبێ و بەشەو بارگەو بنەی تێكدەنێ و ماڵی دێنێتە گوندی رەشكینی هەولێرێ .

بەهەرحاڵ بە مامۆستام گوت : سەربەرزین و شادومان دەبین ئەگەر بتوانیت گرێبەستێكمان لەگەڵ بكەیت وەكو ئەكادیمیای بەدرخان بۆ توێژینەوەی رۆژنامەوانی و كەلتوور بۆ چاپكردنەوەی بەرهەمەكانی پێشووت و ئەوانەی چاپنەكراوە لە دوو توێی چەند بۆكسێك بە چاپێكی جوان و بەشێوەی بەرگتێگیراو چاپ و بڵاویبكەینەوە .
بە نابەدڵی سەیرێكی كردم و گوتی: سەرچاوەی داراییتان چییە ؟ لە كوێ دابینیدەكەن ؟
منیش زۆر دڵخۆشبووم بەو پرسیارە و یەكسەر وەڵاممدایەوە و پێمگوت: دكتۆر گیان سەرچاوەی داراییمان لە فرۆشتنی هەفتەنامەی بەدرخان و ریكلام و بڵاوكراوەكانمان و ئەو فێستیڤاڵە نێودەوڵەتییانەی لە دەرەوەی هەرێمی كوردستان ئەنجامی دەدەین ، كە بە میوانەكانمان گوتووە بڕێك پارە دەبێ بدرێت بە ئەكادیمیای  بەدرخان، ئەوانیش رەزامەندبوونە.
ئەویش گوتی : واتە خۆت و دەستەی نووسەران  كەستان مووچەتان نییە! منیش گوتم : نەخێر نیمانە و دەتوانی پرسیاربكەی.
ئەویش گوتی: نازانم چۆن قەناعەت بكەم، ئەو هەموو كارە جوان و راكە راكەتان لە سەری دنیا بۆ ئەو سەری دنیا ، لەگەڵ ئەوەش هێشتا ناتوانم بڕوابەخۆم بكەم كە بەو داهاتە كەمە هەتانە ، ئەو هەموو كارانە ئەنجام بدەن!

منیش گوتم: دكتۆر، قەناعەت بكە! فێستیڤاڵی یەكەمی بەدرخان لە ساڵی 2004 لە سلێمانی ئەنجامدرا وەكو هاوكاریەك مام جەلال پێشكەشی كردوین، فێستیڤاڵی دووەمی بەدرخان لە دهۆك لە ساڵی 2005 د. كەمال فوئادو نێچیرڤان بارزانی یارمەتی داین، فێستیڤاڵی سێیەمینی بەدرخان لە هەولێر ساڵی 2006 حكومەتی هەرێم یارمەتی داین، فێستیڤاڵی چوارەمی بەدرخان لە ئەڵمانیا لە بەرلین 2007 ئەنجام دراوە، تاكو ئێستا 46000 هەزار دۆلاری تكتی فڕۆكەی میوانەكانم  هێشتا وەر نەگرتۆتەوە، فێستیڤاڵی پێنجەم لە قاهیرە 2008 شێخ بایز تاڵەبانی ،ئەوكات وەزیری دارایی و ئابووری بوو یارمەتی داین ، فێستیڤاڵی  شەشەمینی بەدرخان لە ساڵی 2008 لە یۆنان سازدرا زۆربەی میوانەكان لەسەر كیسەی خۆیان هاتبوون، جگە لە یارمەتیەكی سنوردار ئەو كات ،د. بەرهەم ئەحمەد ساڵح سەرۆك وەزیرانی هەرێمی كوردستان بوو، لە فێستیڤاڵی حەوتەمینی  بەدرخان لە پاریس لە 2009 ئەنجامدرا ،  لە دیدەنییەكی بەڕێز عەدنان موفتی ئەوكات سەرۆكی پارلەمانی كوردستان بوو بەمنی گوت ئەرێ كاك حەمید ماندوو نەبووی ئەوەندە لە دەرگاكان دەدەیت بۆ كۆمەكی دارایی سازدانی  فێستیڤاڵی بەدرخان لە دەرەوە ، دووبارە موفتی گوتی  بەباشی دەزانم میوانەكان لەسەر كیسەی خۆیان سەفەر بكەن و تۆش كارئاسانی ڤیزا وەرگرتنیان  بۆ بكەی ، واتە پارەی تكت و نانخواردن و ئوتێل باخۆیان بیدەن.. لە پاش 2009 تاكو ئەمڕۆ فێستیڤاڵی نێودەوڵەتی بەدرخان لەسەر ئەستۆی میوانەكان بووە.
عەزیز گەردی لەپڕ دەستی خستە سەر شانم و گوتی  : ئەو زانیاریانە بۆ من نوێ بوون ، ئەویش ئەگەر وابێ !؟ بەڵام گومان دەكەم ، پێدەچی تۆ پیاوی دەستەلات بیت !!  مومكینی نیە كەسێك ئەو هەموو كارە بكات و كۆیلەی كەس نەبێ.. لە دوا قسەشی گوتی: من بەرهەمەكانم یەك جار چاپ دەكەم و فریای ئەوانی دیكە ناكەوم.. ئەوە دوا دیداری من لەگەڵ ئەو زاناو دانایە بوو .

٭ گەردی كەی لەدایك بووە؟
هاوڕێم عەبدولڕەحمان مەعروف لە ئینسایكلۆپیدیای نوسەرانی هەولێر ساڵی لەدایك بوونی 1946 هەولێر ،  شارۆچكەی بەحركەی نووسیوە، كەچی بەدەسخەتی خۆی لە نامەیەكدا بۆ پڕۆفیسۆر شوكریە رەسوڵ، مامۆستای زانكۆی نووسیوە ساڵی  1948 لە دایكبوومە، هەر لەو نامەیەدا دەنوسێ من لەدایكبووی 1950، بەڵام بەهۆی دامەزراندن كردویانەتە 1948.

٭ ئایا گەردی قەڵەمێكی یاخی بوو؟
لەزۆر لەو نووسینانەی لەسەری (1948-2022) گەردی هەرگیز قەڵەمێكی یاخی نەبووە دژ  بە كۆمەڵگای كوردەواری ، لەهەمان كاتیشدا هەرچی پێویست بوە بۆ ئەوەی كۆمەڵگای كوردی هۆشیار بێ وخاوەنی بیر و هزری خۆی بێت و  سودی لێوەربگیرێت ئەو درێخی نەكردووە ،  بۆیە لەو بەرهەم و رۆمانانەی كەلە بوارە جیاجیاكاندا وەریگێڕاوەتەوە سەر زمانی كوردی ، رەنگیداوەتەوە .
گەردی  زمانەكانی (عەرەبی، فارسی، ئینگلیزی، فەرەنسی) وەكو كوردیی زانیوە، بۆیە دەكرێت بگوترێت عەزیز گەردی یاخی بوو لەو كەسانەی كە بێویژدانانە و وەكو قەلەمێكی قوڕمساخ كاریان دەكرد بۆ بەرژەوەندی كەسی و دڵی رووناكبیران و زاناو داناكانیان پێ دەشكاندو دەڕەنجاند ، بۆیە بێ هیوا ببو تاوای لێهاتبوو گومانی لە هەموو كەسێك دەكرد، لە پەیوەندییەكی تەلەفۆنی لەگەڵ عەبدولقەهار گەردی برای پێم گوت :  هۆكاری ئەوە چی بوو ،  زۆربەی زۆری خەڵكی رەتدەكردەوە؟
لەوەڵامدا گوتی: ئەو لە دڵەوە قین و رق و بوغزی لەگەڵ كەس نەبوو! زۆر جار بەمنی دەگوت بۆیە وادەكەم، بۆ ئەوەی روناكبیران و خوێندەواران بەخۆیاندا بچنەوەو تووشی كاری خراپ نەبن و نەبنە ماڵوێرانی بۆ یەكتر، هەروەها گوتیشی لە دواساتی نەخۆشخانە ئەوەی لێ بەدی دەكرا كە بەبێ جیاوازی بەخێرهاتنی میوانانی دەكردو وەڵامی دەدانەوە.

٭ ئایا عەزیز گەردی فەراهیدی كوردە؟
سەبارەت بە كێش و سەروا لە شیعری كوردیدا، گەردی ماستەرو دكتۆراكەی تایبەت بوو بەو باسە، بەلام تەنیا نووسینی تێزو نامە نەبوو، واتە هەر لە بۆ ماستەر و دكتۆرا نەبوو،  بەڵكو ئەو دەیخواست زۆر سەركەوتوانە هەندێك كاری نوێی تێدابكات و لەئەنجامدا بە كۆمەڵێ راسپاردە و ئاشكراكردنی ئەوانەی ئاشكرانەكراون، ئاشكرایان بكات ... گەردی توانی هەرچی كون و كەلەبەری كێش و عەرووزی كوردی هەیە لە دووتوێی  حەوت بەرگدا كۆبكاتەوە، مخابن ئەو شاكارە گەورەیەی نەبینیی، كە نووسەرو چیرۆكنوس سابیر رەشید ئاشكرایكرد  وا لە دەزگای فامە لە هەولێر و ئامادەی چاپە.
 بۆیە سەبارەت بە فەراهیدی عەرەب كە پێش 1400 ساڵ یەكێكە لە بیرمەندان و داهێنەرانی كێشی عەرووزی عەرەبی،  هەرسەبارەت بەو بابەتە  د. وریا عومەر ئەمین لە نووسینێكدا دەڵێت :  د. عەزیز گەردی فەراهیدی كوردەو هیچی لە فەراهیەی عەرەب كەمتر نەبوە.

٭ (ئەمن هەر پە یێ خۆ كەم)
لەكاتی ئامادەكردنی كتێبی عەزیز گەردی پادشای زمان و وەرگێڕان لەوانەیە پەیوەندیم بە 200 كەسەوە كردبێت ، هەر لە بنەماڵەی خۆی تا هاوڕێ نزیكەكانی.
یەكێك لەوانە چیرۆكنووس كاك سالار عەبدولڕەحمانی هاوڕێی تەمەنی رەوانشاد عەزیز گەردی بوە، كە زیاتر لە 25 ساڵ بوو دەیناسی و چەندین ساڵیش هاموشۆی كردوەو گەلێك سەفەرو گەشتی لەگەڵ ئەنجامداوە .

چەندین پرسیارم لەكاك سالار كردووە دەربارەی عەزیز گەردی بەحوكمی ئەوەی زۆر لێی نزیك بووە، بەداخ و حەسرەتەوە گوتی: گەردی پیاوێكی گەورەو دووربینبوو، زانایەكی هەرچەندە بڵێی پڕ زانیاری و لێكۆڵیارێكی وردو قسەكانی هەمووی لە جێی خۆیدا بوو.. چەند خۆش باوەڕ بوو، دوو هێندە بەگومان بوو، زۆر قسەی خۆش لەنێوانمان هەبوو ، لەبۆییم گێڕایەوە ، كاتی خۆی خزمێكی بەتەمەنمان هەبوو  ، لەسەر عینادی و هەر بە قسەی خۆكردن، ئەویش ناوی خار مەد بوو ( خاڵە مەد) ، دەتدیت سەعاتێك قسەیان لەبۆ دەكرد و ئەویش گوێی دەگرت ، لە دواییدا و بەبنزار و گفتی خەیلانییان  وەڵامی دەدانەوە و دەیگۆت : (ئمممم ، ئەمن تێ گەم تێ گەم، بەرێ  هەر  پە  یێ خۆ كەم)، واتە هەر بەقسەی خۆم دەكەم ،كاك سالار دەڵێ:  مامۆستا عەزیزگەردی زۆر جار عینادی و لاملی  لە هەندێك شت دەكرد ، دەمدیت بە سوودی خۆی نەبوو وبگرە زیانیشی بەخۆی دەگەیاند ، منیش دەمگوت : ئاخر وەها نابی نا، بەخوای مامۆستا ئەو شتە سوودی نییە، یان زیانی لەبۆ خۆت هەیە.
كەچی ئەو پێی  دەگوتم : كاك سالار (ئەمن هەر پە یێ خۆ كەم) واتە من هەر بەقسەی خۆم دەكەم هەرچی سەبارەت بەكارەكانی بوو، ئەو خۆی لە هەمووان باشتر دەیزانی چی دەكات و هەنگاوەكانی داهاتووی چییە ؟... پیاوێكی زۆر بەوەفاش بوو.


٭ عەزیز گەردی ئەو قەڵەمەی بەتەنیا ژیا
خۆ ئەگەر گەردی تێكەلاوی پەیوەندییە روناكبیریی و بوارە كۆمەڵایەتییەكان بوایە، هەرگیز نەیدەتوانی ئەو هەموو بەرهەمانە بنووسێت و بڵاویان بكاتەوە، بۆیە تەنیایی و ژیان لەنێو كتێبخانەیەكی دەوڵەمەندی وەكو كتێبخانە كەسییەكەی خۆی لە شارۆچكەی بەحركە، گەورەترین میدالیاو سەروەری بەخشیە پرۆفیسۆر عەزیز گەردی، بۆیە تەنیایی ژیان بۆ ئەو لەپێناو گەلی كوردو هاوڵاتیانیدا بووە.

٭ یەكەمین دیداری لە هەفتەنامەی بەدرخان بڵاوكراوەتەوە .
لە ژیانی تایبەتی خۆی هیچ دیدار و لێدوانی نەبووە  تەنیا یەك دیداریم دیوە، ئەویش وەكو دیداری رۆژنامەوانیی نەبوە، بەڵكو نوسەرو وەرگێڕ، بەڕێز حەیدەر عەبدوڵڵا لەسەردانێكی بۆ لای گەردی لەماڵەكەی خۆی لە شارۆچكەی بەحركە پاش یەكتر ناسین دەمەتەقێیەك دروست دەبێ لەنێوان هەردووكیان دەبێتە زادەی بابەتێكی رۆژنامەوانیی وەكو دیدار، ئەویش لە ساڵی 2015 لە هەفتەنامەی بەدرخان بڵاوكرایەوە.

٭ ماڵی عەزیز گەردی
زۆر دڵشادو دڵخۆش بوین كە هەواڵی ئەوەمان زانی ، لەم چەند رۆژانەی رابردوودا بنەماڵەی گەردی چونەتە وەزارەتی رۆشنبیری و لاوانی حكومەتی هەرێمی كوردستان مۆڵەتی كردنەوەی (ماڵی عەزیز گەردی)یان وەرگرتوە.
بۆ ئەوەی بتواندرێت لەو رێگایەوە كتێبخانەكەی بپارێزرێت و لەلایەن كارمەندی كتێبخانەكەوە كتێبەكان پۆلێنبكرێن و رێكبخرێنەوە ، هەموو ئەو میوان و خوێندكارانەی ماستەر و دكتۆرا كە پێویستیان بەسەرچاوە و كتێبە دەتوانن وەریبگرن و لەدواییدا بیگێڕنەوەو سوودی لێوەربگرن .
بەهیواشین هەرچی زووە ئەو كتێبخانەیە ،واتە ماڵی عەزیز گەردی بەرەو رووی میوانەكان بكرێتەوە و دووبارە ماڵی عەزیز گەردی ئاوەدانبكرێتەوە و سەرجەم بەرهەمەكانیشیی دووبارە چاپبكرێتەوە  .

٭ وەسیەتنامەكەی عەزیز گەردی
پاش ئەوەی دەستم بە خۆ ئامادەكردنكرد بۆ ئەوەی بتواندرێت لەكاتی دیاریكراو كتێبەكە چاپبكرێت، هەمیشە لەپەیوەندییدابووم لەگەڵ كاك قەهاری برای ، شەوێكیان گوتی : كاك حەمید، برا گەورەكەمان كە ناوی كاك كوردۆیە  دەڵێت: گەردی وەسیەتیكردوە، ئەگەر مردم لە نێو ماڵەكەی خۆم بمنێژن ، منیش حەپەسام !!لەلایەك بۆچی زووتر ئەو قسەیەیان نەكردوە، لەلایەكیدیكەش دڵخۆشبووم كە ماڵی گەردی هەمیشە وەكو مەزارێكی پیرۆزی روناكبیریی سەیردەكرێت ...بۆیە من بەباشیی دەزانم بنەماڵەكەیان بە جددی بیر لە گواستنەوەی تەرمی پیرۆزی گەردی بكەن بۆ نێو ماڵەكەی خۆی.

٭لەبارەی دووبارە چاپكردنەوەی كتێبەكانی عەزیز گەردی .
لەوەڵامی پرسیارێكدا، بۆچی یەكجار كتێبەكانی چاپدەكرد، بەڕێز قەهار گەردی برای بەمجۆرە وەڵامی دامەوە :لە بارەی دووبارە چاپكردنەوە كتێبەكانیی دەیگوت زمان و وشە ، لە دنیادا لە پێشكەوتن و گۆڕانكاریدایە، ئەو دەیگوت  ئەگەر بمەوێت كتێبێك چاپ بكەمەوە دەبێ جارێكیدیكە وەر یگێرمەوە ئەوسا دەبێ دووبارە بەچاپی بگەیەنم .

٭زۆر پرسیار دەكرێت، سەبارەت بە ژن نەهێنانی عەزیز گەردی؟
دیسان كاك قەهاری برای دەربارەی ژن نەهێنانی گوتی : لەبارەی ژن نەھێنانیشی خزم و ناسیاو زۆر جاران پێیان دەگوت ، بۆچی ژنێك ناهێنیت ؟ ئەویش لە وەڵامدا دەیگوت ئەوەی من دەیكەم ھیچ ژنێك ئەوەم لێ قبوڵ ناكاو و كچی خەڵكیش لەگەڵ خۆم بە ھیلاك نادەم ...!، بۆیە ئاوا بۆ من باشترە و هەر فریای خوێندنەوە و زانكۆ و كارەكانی خۆم دەكەوم .

٭ ئەحمەد محەمەد ئیسماعیل و نیكۆس كازانزاكیس .
لە سەفەرێكی ئەكادیمیای بەدرخان بۆ وڵاتی یۆنان و لەوێشەوە بۆ دورگەی (كریت) شوێنی لەدایك بوونی نیكۆس كازانزاكیس ئەو نوسەرو رۆماننوسەی كە گەلی یۆنان شانازی پێوە دەكەن،  پاش ئەوەی كۆنفرانسەكەمان لە دوورگەی كریتا لەگەڵ رەوا حەمە كەریم و كاك حەمەدەمین بەڕێوەبرد، سەبارەت بەوەی ئایا نیكۆس كازانزاكیس بۆچی لە رۆمانی زۆربا كە چیرۆكنوس رەئوف بێگەرد وەریگێڕاوەتە سەر زمانی كوردی ، كە دەڵێ: (تۆپخانەی كوردەكان ئێمەیان دەشێلا، یاكوردەكان لەپێش چاوی ئێمە قەشەكانیان ناڵ دەكرد).
 مەبەستمان بوو بزانین گەلی یۆنانیش ئەو بروایەیان هەیە سەبارەت بە گەلی كورد هەروەكو نیكۆس لەو رۆمانە بانگەشەی بۆ دەكات !
پاش پێشكەشكردنی وتارەكان لەو كۆنفراسە كە بەڕێزان شێرزاد حەسەن ، د.ئازاد حەمە شەریف ، شیلان یاسین ،  د.ئیسماعیل قەرەداغی و ئازاد سادق و دڵزار حەسەن و دارا محەمەد عەلی و فەیسەڵ عوسمان و سمكۆ عەبدولكەریم ... هتد میوانی ئەكادیمیای بەدرخانبوون ، لەپاشان یۆنانییەكان گوتیان ئەوە خەیاڵی نیكۆسە، چونكە ئەو كاتە كە ئەو باسی دەكات، سەردەمی حوكمی عوسمانییەكان بوە و بەدرێژایی 500 ساڵ ئێرەیان داگیركردوەو حوكمیان تێدا كردوە، نەخێر كورد میلەتێكی ئاوا بێ بەزەیی نەبووە، بەڵكو توركەكانبوون ، یا عوسمانییەكان بوون ،لە پەرلەمانی یۆنان پێشوازیكراین   بەناوی گەلی یۆنان داوای لێبوردنیان لە گەلی كورد كرد.
لەكاتی چوونیشمان  بۆ ماڵەكەی و مۆزەخانەكەی نیكۆس لە گوندەكەی خۆی لە هەمان شوێنیی لەدایكبوونیی نیكۆس ، دە كتێبی وەرگێڕدراو بە كوردی كە بەرهەمی نیكۆس بوو ، لەلایەن نووسەران و وەرگێڕانی كورد كراوەتە كوردی تەسلیم بە مۆزەخانەكە كرد ، لەوێ نوسەرو چیرۆكنوس ئەحمەد محەمەد ئیسماعیل گوتی: ئێمە لە ولاتێكی دوورە دەستەوە هاتوین بۆ ئێرە بۆ سەردانی ماڵی ئەو گەورە نووسەرە،
ئاخۆ ئەگەر نووسەرو رۆماننوسێكی كورد بمرێت ئێمە بیبەین بۆ كوێ

٭ دوا وتە
لەكاتی نووسین و ئامادەكردنی ئەو كتێبە ، كە زۆرترین پەیوەندیم لەگەڵ بنەماڵە و هاوڕێ كۆن و نوێكانی ئەنجامداوە ، هەندێك رۆژ لە سەعات 7ی بەیانی تاكو دووی شەو .
بۆیە جیرانەكانمان چەندینجار بە توڕەبوونەوە لەدەرگایانداوە و گلەییانكردوە كە دەنگم زۆردێت و خەوم لەوان زڕاندوە ،  ئەوانم ئیزعاج كردوە، بۆیە دواجار گوتیان، ئەگەر دووبارەی بكەیتەوە بە پۆلیس دەڵێین.
من چەندینجار داوایلێبووردنم كرد سوودی نەبوو، كێشە نییە با كتێبەكە تەواوببێت ببینن كە ئەو هەموو تەلەفۆن و هەراو هۆریایە بۆ عەزیز گەردی دەهێنێت یان ناهێنێت !؟
 بۆیە لە دوای ئەو رێككەوتە 25-06-2022 بۆ تەلەفۆنكردن دەچمە دەرەوە و لە پاركێك تێل دەكەم و هەرشتێك هەبێت لەگەڵ كاك جەلیل و كاك ستار و كاك دڵشاد و هاوڕێیان ئەنجامیدەدەم .

نوسینی: حەمید ئەبوبەكر بەدرخان