عیراق و ئێران گرنگی زیاتر به‌مۆزه‌خانه‌كان ده‌ده‌ن

حه‌سه‌ن نازم وه‌زیری رۆشنبیری و گه‌شتوگوزارو شوێنه‌واری فیدڕاڵی ئه‌مڕۆ یه‌كشه‌ممه‌ تاوتوێیكرد له‌باره‌ی شێوازی هاوكاری نێوان مۆزه‌خانه‌كانی عیراق و ئێران و ئاڵوگۆڕی زانیارییه‌كان و خستنه‌كاری ته‌كنه‌لۆژیای نوێ له‌كاری مۆزه‌خانه‌دا.

وه‌زاره‌تی رۆشنبیری و گه‌شتوگوزارو شوێنه‌وار له‌حكومه‌تی فیدڕاڵ له‌ڕاگه‌یه‌نراوێكدا كه‌وێنه‌یه‌كی ده‌ست PUKmedia كه‌وتووه‌ باسی له‌وه‌شكردووه‌ كه‌ حه‌سه‌ن نازم ئه‌مڕۆ له‌میانی سه‌ردانێكیدا بۆ مۆزه‌خانه‌ی نیشتمانی ئێران له‌تاران چاویكه‌وتووه‌ به‌ژماره‌یه‌ك له‌و كه‌لوپه‌لانه‌ی خرابوونه‌ڕوو له‌تابلۆو پارچه‌ی شوێنه‌واری و ده‌ستنووس و شتی به‌نرخ و گرانبه‌ها كه‌ مێژووه‌كانیان بۆ چه‌ند قۆناغێكی جیاواز له‌شارستانی ئێرانی ده‌گه‌ڕێته‌وه‌.

له‌ڕاگه‌یه‌نراوه‌كه‌دا هاتووشه‌ كه‌ وه‌زیری رۆشنبیری به‌هاوڕێیه‌تی له‌یس مه‌جید حسێن سه‌رۆكی ده‌سته‌ی گشتی شوێنه‌وارو كه‌له‌پوور و ژماره‌یه‌ك له‌به‌ڕێوه‌به‌ره‌ گشتییه‌كانی ناو وه‌زاره‌ت چه‌ند هۆڵێكیان له‌مۆزه‌خانه‌ به‌سه‌ركردۆته‌وه‌ كه‌به‌یه‌كێك له‌به‌ناوبانگترین مۆزه‌خانه‌كانی جیهان داده‌نرێت.
راگه‌یه‌نراوه‌كه‌ باسی له‌وه‌شكردووه‌ كه‌ له‌میانی سه‌ردانه‌كه‌دا وه‌فده‌كه‌ی وه‌زاره‌تی رۆشنبیری گفتوگۆیان كردووه‌ له‌باره‌ی شێوازی هاوكاریكردن له‌نێوان مۆزه‌خانه‌كانی عیراق و ئێران و گۆڕینه‌وه‌ی زانیاری و خستنه‌كاری ته‌كنه‌لۆژیای نوێ له‌كاری مۆزه‌خانه‌داو ئاڵوگۆڕی سه‌ردانه‌ زانستی و پێشخستنه‌كان له‌نێوان كادیرانی هه‌ردوو دامه‌زراوه‌كه‌.

هه‌ر به‌گوێره‌ی راگه‌یه‌نراوه‌كه‌، لای خۆیه‌وه‌ به‌رپرسانی كارگێڕی مۆزه‌خانه‌ی ئێران ئاماده‌یی ته‌واوی خۆیان بۆ وه‌فدی وه‌زاره‌تی رۆشنبیری و گه‌شتوگوزارو شوێنه‌واری فیدڕاڵ ده‌ربڕیوه‌ بۆ هاوكاریكردنی ئیداره‌ی ده‌سته‌ی گشتی شوێنه‌وارو كه‌له‌پوور له‌سه‌رجه‌م جومگه‌كانی كاری مۆزه‌خانه‌و ئه‌نجامدانی یاداشتی لێكتێگه‌یشتن له‌و بواره‌ گرنگ و كاریگه‌ره‌دا.

وه‌زاره‌تی رۆشنبیری فیدڕاڵله‌ڕاگه‌یه‌نراوه‌كه‌یدا ئاماژه‌شی به‌وه‌داوه‌ كه‌ مۆزه‌خانه‌ی نیشتمانی ئێران كه‌ زیاتر له‌ 300 هه‌زار  پارچه‌ی شوێنه‌وار له‌خۆده‌گرێت و له‌سه‌ر رووبه‌ری 20هه‌زار مه‌تر دووجا دابه‌شبوون، له‌ڕووی رووبه‌رو هه‌مه‌چه‌شنه‌یی و جۆرێتی شوێنه‌واره‌كانی به‌یه‌كێكله‌مۆزه‌خانه‌ به‌ناوبانگه‌كانی جیهان داده‌نرێت، جگه‌له‌وه‌ی مۆزه‌خانه‌كه‌ به‌مۆزه‌خانه‌ی دایك له‌ئێران داده‌نرێت، كه‌ئامانج لێی پاراستنی شوێنه‌واره‌كانی رابردوو و گواستنه‌وه‌ی بۆ نه‌وه‌كانی داهاتوو و ره‌خساندنی تێگه‌یشتنی باشتر له‌نێوان گه‌لان و وڵاتانی جیهان، ئه‌و رۆڵه‌شی ئه‌و شوێنه‌وارانه‌ هه‌یانبووه‌ له‌دروستكردنی كه‌لتوورو شارستانیه‌تی جیهان و هه‌وڵدان بۆ به‌هێزكردنی زانیاری گشتی.

PUKmedia راگه‌یاندنی وه‌زاره‌تی رۆشنبیری فیدڕاڵ