نوێنه‌ری یه‌كێتی له‌ ھۆڵه‌ندا به‌شداری كۆنگره‌ی پارتی كاری ھۆڵه‌ندی ده‌كات

به‌ختیار به‌كر به‌ نوێنه‌رایه‌تی یه‌كێتیی نیشتیمانیی كوردستان، له‌سه‌ر بانگھێشتی ڕه‌سمی لایه‌نی به‌رامبه‌ر، به‌شداری كۆنگره‌ی پارتی كاری ھۆڵه‌ندی ده‌كات و په‌یامێكی نووسراوی سه‌ركردایه‌تی یه‌كێتی ده‌گه‌یه‌نێته‌ سه‌رۆكایه‌تی پارته‌كه‌. 
كۆنگره‌ی سۆسیال دیموكراته‌كانی ھۆڵه‌ندا، سه‌رله‌به‌یانی ڕۆژی شه‌مه‌ 11-6-2022 له‌ شاری نیووخاین، به‌ ئاماده‌بوونی نوێنه‌ری یه‌كێتی و نوێنه‌رانی چه‌ندین پارت و ڕێكخراوی سیاسی جیھانی، ده‌ستی به‌كاره‌كانی كرد. به‌ده‌ر له‌ به‌شداری كردن، نوێنه‌ری یه‌كێتی له‌ هۆڵه‌ندا كه‌ به‌شداری بوو له‌كۆنگره‌كه‌، نامه‌یه‌كی فه‌رمی تایبه‌تی یه‌كێتی له‌ ئاستێكی باڵای حزبیدا ، گه‌یانده‌ سه‌رۆكایه‌تی پارتی كار و له‌ یه‌كێك له‌ پانێڵه‌كان، بابه‌تێكی پیشكه‌ش كرد سه‌باره‌ت به‌ دوایین گۆڕانكارییه‌كان له‌ناوچه‌كه‌دا.

نوێنه‌ره‌ به‌شداربووه‌كه‌ی یه‌كێتی به‌ میدیای یه‌كێتی ڕاگه‌یاند: كه‌ كۆنگره‌كه‌ به‌سه‌ركه‌وتوویی به‌ڕێوه‌ڤچووه‌ و ده‌رفه‌تێكی باش بووه‌ بۆ گه‌یاندنی په‌یامی سیاسی و سازدانی دیداری دووقۆڵی له‌گه‌ڵ دۆسته‌كانمان له‌ پارته‌ چه‌پ و دیموكراته‌كانه‌كان به‌گشتی و ده‌سته‌خوشكه‌كانمان به‌دیاریكراوی.  هه‌ر له‌كۆنگره‌كه‌ به‌ جیا نوێنه‌ری یه‌كێتی له‌گه‌ڵ به‌رپرسیاری مه‌كته‌بی كاروباری ده‌ره‌وه‌ی پارتی چه‌پی سه‌وزی هۆڵه‌ندی كۆبۆته‌وه‌. 
پارتی كاری هۆڵه‌ندی، پارتێكی (سۆسیال دیموكرات)ه‌ وھاوتای یه‌كێتی، ه‌ندامی خێزانی سۆسیالیست ئینته‌رناسیۆنال و هاوپه‌یمانی پێشكه‌وتووخوازه‌، له‌ساڵی ١٩٤٦ دامه‌زراوه‌ و یه‌كێكه‌ له‌ پارته‌ ڕه‌سه‌نه‌كان، به‌درێژایی مێژوو ئه‌گه‌ر له‌ لوتكه‌ی ده‌سه‌ڵاتدا نه‌بووبن ئه‌وا ھه‌میشه‌ ئۆپۆزیۆنێكی به‌ھێز و ڕێزلێگیراو بوونه‌. له‌ ئێستادا به‌رنامه‌ی پێشڕه‌وی كردنییان ھه‌یه‌ له‌ فراوانكردنی به‌ره‌ی چه‌پ له‌ ھۆڵه‌ندا، بۆ ئه‌م مه‌به‌سته‌ له‌گه‌ڵ پارتی چه‌پی سه‌وزی ھۆڵه‌ندی جۆرێك له‌ نزیك بوونه‌وه‌ ھه‌یه‌ له‌نێوانیاندا به‌ دوورنازاندرێ بۆ داھاتوو بیرۆكه‌ی پێكھێنانی لیستی ھاوبه‌ش و تێكه‌ڵكردنی فڕاكسیۆنه‌كان ببه‌نه‌ قۆناغی جێبه‌جێكردن و تا ئاستی یه‌كگرتن ھه‌نگاوبنێن. له‌ یه‌كه‌م ھه‌نگاودا ھه‌ریه‌ك له‌ كۆنگره‌ی پارتی كار و پارتی چه‌پی سه‌وز بڕیاریاندا كاری پێكه‌وه‌یی ئه‌نجام بده‌ن و فڕاكسیۆنی ھابه‌شییان ھه‌بێت له‌ ژووری یه‌كه‌می په‌رله‌مان كه‌ ھاوشێوه‌ی ئه‌نجومه‌نی پیرانه‌.
PUKmedia