شوێنەواری گەرمیان لەبارەی ئەو بەردەی پاسەوانی كرا روونكردنەوە دەدات

چەند كەسێك لە گەرمیان دەیانەوێت بەردێك ببەن و وادەزانن ئاڵتوون و خشڵی تێدایە، ئاسایشی مەیدان 34 رۆژ پاسەوانیی بەردەكە دەكات، بەڵام شوێنەواری گەرمیان لێكۆڵینەوە دەكات و دەڵێت: تەنیا بەردێكی ئاسایی بوو.
بەڕێوەبەرایەتی شوێنەوارو كەلەپوری گەرمیان رایگەیاند: پاش ئەوەی لە گوندی كەمتاران هەوڵی تێكدان و بە تاڵان بردنی بەردێكی گەورە درا بەگومانی بونی كەنزو خشڵ و پارچەی شوێنەواری تیایدا، دوای وەرگرتنی رەزامەندی بەڕێوەبەرایەتی گشتی شوێنەوار وە بە ئاگاداری ئیدارەی گەرمیان و بەڕێوەبەرایەتی ناحییەی مەیدان وە بەهاوكاری ئاسایشی گەرمیان ـ یاریدەدەرێتی ئاسایشی دەربەندیخان، بنكەی ئاسایشی مەیدان و پۆلیسی گەرمیان و بنكەی پۆلیسی مەیدان، بە چاودێری كۆمەڵێك لە خەڵكی ناوچەكە و مامۆستای ئاینی و ئەنجومەنی گوندەكەو چالاكوانان، بەشێك لەبەردەكە كرایەوە بەتایبەت ئەو شوێنەی كە هەوڵی كونكردنی درابوو، ئەمەش لە پێناو ڕەواندنەوەی گومانەكان و پشودان بە بنكەی ئاسایشی مەیدان كە ماوەی 34 ڕۆژە پاسەوانیان لەم بەردە كردووە. 
راشیگەیاند: لەكۆتاییدا بۆمان دەركەوت كە بەڵی ئەم بەردە تەنها بەردێكی سروشتیە، نەشوێنەواریەو نەخەزنەی تیادایە.
بەرێوەبەرایەتی شوێنەواری گەرمیان سوپاسی دەزگا ئەمنیەكان بەتایبەت بنكەی ئاسایشی مەیدان دەكات و دەشڵێت: داواكارین لە خەڵكی دڵسۆزی ناوچەكەش زیاتر چاوكراوەبن بۆ پاراستنی ناوچە شوێنەوارییەكان، لەهەمان كاتیشدا دووركەوتنەوەی ئەو خەڵكانەی كە دوای خەونی خەیاڵاوی كەوتوون لە دۆزینەوەی خەزینە و هێما و كۆمەڵی شتی دیكەی بێ بنەما و دروستكراو بۆ تێكدانی سروشتی 
جوانی ناوچەكە.

PUKmedia