ژنە رۆژنامەنوسێكی دیاری كەناڵی ئەلجەزیرە كوژرا

شیرین ئەبو عاقلە پەیامنێری دیاری كەناڵی جەزیرە لەكاتی روماڵی هەڵكوتانی هێزەكانی ئیسرائیل بۆ سەر كەمپی جنین بە تەقەی هێزەكانی ئیسرائیل كوژرا.
وەزارەتی تەندروستیی فەڵەستین رایگەیاند: شیرین ئەبوعاقلە گولـلەیەك بەر سەری كەوتووە، گواستراوەتەوە نەخۆشخانەی ئیبن سینا لە شاری جنین و دواتر گیانی لەدەستداوە.
شیرین ئەبو عاقلە لە ساڵی 1971 لە قودس لەدایكبووە، لە رامەڵا نیشتەجێ بوو، كۆلێژی ئەندازیاری بیناسازیی لە زانكۆی زانست و تەكنەلۆژیا لە ئوردن تەواوكردووە، دواتر چووەتە بەشی رۆژنامەڤانی و بڕوانامەی بەكالۆریۆسی لە زانكۆی یەرموك لە ئوردن بەدەستهێناوە.
دوای تەواوكردنی زانكۆ گەڕاوەتەوە فەڵەستین و لە رادیۆی دەنگی فەڵەستین، كەناڵی ئاسمانیی عەممان، دەزگای مفتاح و رادیۆی مۆنتیكارلۆ كاریكردووە، لە ساڵی 1997 بووەتە كارمەندی كەناڵی جەزیرەو تاوەكو كاتی كوژرانی لە 11ی ئایاری 2022 لە كاركردن بەردەوامبوو.

PUKmedia