ئەو كەسەی بەچەقۆ هاوسەرەكەی برینداركرد دەستگیركرا

هێزە ئەمنیەكانی سلێمانی ئەو تۆمەتبارەیان دەستگیركرد كە 12 چەقۆی لەهاوسەرەكەیدابوو برینداری كردبوو.

راز فریاد وتەبێژی بەڕێوەبەرایەتی بەرەنگاربوونەوەی توندوتیژی خێزانی و ژنان لەسلێمانی دەستگیركردنی ئەو تۆمەتبارەی كە لە چەند رۆژی رابردوودا 12 چەقۆی لەهاوسەرەكەیدا بۆ PUKmedia پشتڕاستكردەوەو رایگەیاند: شەوی رابردوو هێزەكانی ئاسایشی سلێمانی دەستگیریانكردوەو وردەكاری دەستگیركردنەكەشی لەلای ئەوانە، بەڵام ئێمە لەدەستگیركردنی ئاگادار كراوینەتەوە.

هاوكات ئاشتی عەبدوڵڵا لێپرسراوی بەشی جێندەر لەنوسینگەی قوباد تاڵەبانی جێگری سەرۆك وەزیران لەبارەی دەستگیركردنی ئەو تۆمەتبارەی 12 چەقۆی لەهاوسەرەكەیدا، رایگەیاند: سوپاس و دەست خۆشی بۆ هێزە ئەمنییەكانی هەرێمی كوردستان كە لەماوەی دوو رۆژی رابردوودا بكوژی ئەو دوو ژنەیان دەستگیركرد كە لەهەولێرو دهۆك كوژرابوون، هەروەها دەستخۆشی لە هێزە ئەمنییەكانی سلێمانی دەكەین، كە شەوی رابردوو ئەو تۆمەتبارەیان دەستگیركرد كە 12 چەقۆی لەهاوسەرەكەیداو هەڵهاتبوو. 

PUKmedia تایبەت