قەڵادزێ.. دوو تۆمەتبار دەستگیر كران

دوو تۆمەتبار بە تۆمەتی بازرگانیكردنی بە ئامێری پشكنینی شوێنەوار (جهاز كشف اثار) لەلایەن پۆلیسیەوە لە قەڵادزێ دەستگیر كران.

لەوبارەیەوە موقدەم شۆڕش ئیسماعیل وتەبێژی بەڕێوەبەرایەتی پۆلیسی ڕاپەرین بە PUKmedia ی ڕاگەیاند: دوای بەدەستهێنانی زانیاری وردی هێزەكانی نووسینگەی نەهێشتنی تاوانی پشدەر( مكافحە) هێزەكانمان دوو تۆمەتباریان بە ناوەكانی(ح.م.ح) لەدایكبووی 1997 پیشەی كاسب و ( س. ئ. ح) لەدایكبووی ساڵی 1992 پیشەی كاسب دەستگیر كرد كە ویستوویانە بازرگانی بە ئامێری پشكنینی شوێنەوار(جهاز كشف اثار) بكەن ولەكاتی دەستگیركردنیاندا دەستیانگرتووە بە سەر چوار ئامێری پشكنینی شوێنەوار. 

وتیشی: دوای لێكۆڵینەوە تۆمەتبارەكان دانیانناوە بە تاوانەكەیان و بە وتەی خۆیان ئەو ئامێرانەیان لە وڵاتی چینەوە هاوردەی هەرێم كردووە بە مەبەستی ساغكردنەوەیان لەبازاڕدا. 

ڕاشیگەیاند: لە ئێستادا تۆمەتبارەكان بەبڕیاری دادوەر بە گوێرەی مادەی 24 لەیاسای بەڕێوەبردن و پاراستنی شوێنەوار و كەلەپوور ڕاگیراون و لێكۆڵینەوە لەگەڵیاندا بەردەوامە. 
PUKmedia  ئاراز ڕەسوڵ