لەهەولێر كچێك لەلایەن باوەژنەكەیەوە دەسوتێنرێت

لەهەولێر كچێك لەلایەن باوەژنەكەیەوە سوتێنراو پۆلیسیش دەڵێت: 80%ی جەستەی كچەكە سوتاوەو باوەژنەكەش دەستگیركراوە.
پۆلیسی هەولێر راگەیەنراوێكی لەبارەی سوتانی كچێك لەلایەن باوەژنەكەیەوە بڵاوكردەوەو رایگەیاند: بنكەی پۆلیسی كەسنەزان ئاگاداركرانەوە بەبوونی روداوێكی سوتان، دوای گەیشتنی هێزەكانی پۆلیس بۆ شوێنی روداو دەركەوت كە كچێكی تەمەن 17 ساڵان بەناوی (رەیان مەحمود جەمیل) لەلایەن باوە ژنەكەیەوە سوتێنراوە.
دەشڵێت: دوای وەرگرتنی وتەی تاوانلێكراو كە لەلایەن باوەژنیەوە سوتێنراوە، دەركەوت كە 80%ی جەستەی سوتاوە.
ئەوەشی خستوەتەڕوو: دوای بەدواداچوونێكی ورد توانرا تۆمەتباری ژن بەناوی (م. ح. ح.) دەستگیر بكرێت و پەڕاوی لێكۆڵینەوەی بۆ رێكخرا بەپێی ماددە (408) لە یاسای سزادان، لەكاتی ئێستادا تۆمەتبار بەپێی هەمان ماددە بەندە.

PUKmedia