گه‌وره‌ترین حه‌شارگه‌ی گیانداره‌ مۆمیاكراوه‌كان له‌ئه‌وروپا ده‌دۆزرێته‌وه‌

پۆلیسی ئیسپانیا له‌كاتی لێكۆڵینه‌وه‌یان له‌ئه‌گه‌ری بوونی قاچاخچێتیكردن به‌ گیانداره‌ مۆمیاكراوه‌كان، توانییان ده‌ستبگرن به‌سه‌ر گه‌وره‌ترین حه‌شارگه‌ی گیانداره‌ مۆمیاكراوه‌كان له‌ئه‌وروپا دوای ئه‌وه‌ی گه‌نجینه‌یه‌كی زه‌به‌لاح له‌ناوچه‌ی ڤالانسیا ده‌دۆزنه‌وه‌ كه‌ژماره‌یه‌كی زۆر گیانداری مۆمیاكراوی تێدابووه‌ وه‌ك كه‌ركه‌ده‌ن و وورچی جه‌مسه‌ری و فیل.

هێزه‌كانی پاسه‌وانی شارستانی راشیگه‌یاند كه‌توانیویانه‌ پێش چه‌ند رۆژێك زیاد له‌ هه‌زار جۆری گیاندار له‌گه‌نجینه‌یه‌كی دروستكراو كه‌ڕووبه‌ره‌كه‌ی 50هه‌زار مه‌تر چوارگۆشه‌یه‌ له‌پیتیرا له‌ناوچه‌ی ڤالانسیا بدۆزنه‌وه‌، كۆمه‌ڵێك گیانداری مۆمیاكراوی تێدا بووه‌و زیاتر له‌ 400 جۆر ده‌بن و كه‌هه‌ندێكیان له‌ جۆره‌ گیانداره‌ قڕبووه‌كانن وه‌ك ئاسكی شاخ كه‌وانه‌یی، یاخود ئه‌و گیاندارانه‌ی هه‌ڕه‌شه‌ی ته‌واو قڕبوونیان له‌سه‌ره‌ وه‌ك پڵنگی به‌نغالی، هه‌روه‌ها چه‌ند جۆرێكی تر له‌ پڵنگ وشێرو گیانداری پشیله‌ی شێوه‌ پڵنگ.

پۆلیس هه‌روه‌ها راشیگه‌یاند: له‌ئێستادا خاوه‌نی گه‌نجینه‌كه‌ به‌تۆمه‌تی تاوانی قاچاخچێتی و تاوانه‌كانی په‌یوه‌ست به‌رووه‌ك و ئاژه‌ڵه‌كان خراوه‌ته‌ ژێر لێكۆڵینه‌وه‌وه‌ به‌ڵام تاوه‌كو ئێستا ده‌ستگیرنه‌كراوه‌.

لێكۆڵه‌ره‌وه‌كانیش به‌های ئه‌و گیانداره‌ مۆمیاكراوانه‌ به‌ 32 ملیۆن دۆلار ده‌خه‌مڵێنن و باسیش له‌وه‌ده‌كرێت كه‌ئه‌م دۆزینه‌وه‌یه‌ درێژكراوه‌ی ئه‌و لێكۆڵینه‌وه‌یه‌ كه‌ پێشتر تیمی پاراستنی سروشتی سه‌ر به‌ پۆلیسی ڤالانسیا له‌مانگی تشرینی دووه‌می ساڵی 2021دا ئه‌نجامیاندابوو، كاتێك پۆلیس به‌وه‌ی زانیبوو ئه‌گه‌ری بوونی ئه‌م جۆره‌ حاڵه‌تانه‌ هه‌یه‌ كه‌په‌یوه‌سته‌ به‌كۆكردنه‌وه‌ گیانداره‌كان له‌پیتیرا.

PUKmedia ئاژانسه‌كان