وه‌زاره‌تی ڕۆشنبیری: هه‌موو لایه‌ك هه‌وڵی ئاوه‌دانكردنه‌وه‌ی هه‌ڵه‌بجه‌ بده‌ین

له‌ 34 هه‌مین ساڵیادی كیمیابارانكردنی هه‌ڵه‌بجه‌، وه‌زاره‌تی ڕۆشنبیری و لاوان له‌به‌یاننامه‌یه‌كدا داوا ده‌كات هه‌موو لایه‌ك هه‌وڵی ئاوه‌دانكردنه‌وه‌ی هه‌ڵه‌بجه‌ بده‌ن و سیمای پارێزگابوونی زیاتر به‌ڕوخسارییه‌وه‌ ده‌ركه‌وێت. 

ئه‌مه‌ش ده‌قی به‌یاننامه‌كه‌

به‌یاننامه‌ی وه‌زاره‌تی ڕۆشنبیری و لاوان له‌یادی كیمیابارانی هه‌ڵه‌بجه‌دا

سی و چوار ساڵ به‌رله‌ئه‌مڕۆ شاری هه‌ڵه‌بجه‌ی كانگای شیعرو هونه‌رو جوانی به‌ر دڕندانه‌ترین شاڵاوی زه‌هرباران و قڕكردن بویه‌وه‌.

دوژمنانی گه‌له‌كه‌كه‌مان به‌ جۆره‌ها چه‌كی كۆكوژ ئه‌و شاره‌یان كرده‌ ئامانج و له‌ساته‌وه‌ختێكی كه‌مدا زیاتر له‌پێنج هه‌زار مرۆڤی سڤیل بونه‌ قوربانی و دوو هێنده‌ش بریندار بوون، كه‌ زۆربه‌یان به‌و برینانه‌وه‌ سه‌ریان نایه‌وه‌و ئه‌وانه‌شی ماون به‌ده‌م ئازاره‌وه‌ ده‌تلێنه‌وه‌.

هه‌ڵه‌بجه‌ شاری شاعیران، كانگای مه‌وله‌وی و نالی و گۆران و ئه‌حمه‌د موختار جاف و ده‌یان ناوی دره‌وشاوه‌ی تر، كه‌له‌كاروانی ئه‌ده‌ب و هونه‌ری گه‌له‌كه‌ماندا پێشڕه‌و بووه‌.

حكومه‌تی هه‌رێمی كوردستان به‌گرنگییه‌وه‌ له‌قوربانیانی ئه‌م شاره‌و خواست و داواكاری خه‌ڵكه‌كه‌ی ده‌ڕوانێت و سبه‌ینێ ئه‌نجومه‌نی وه‌زیران له‌كۆبوونه‌وه‌ی ئاسایی خۆیدا بڕگه‌یه‌كی تایبه‌ت كردووه‌ به‌گفتوگۆ له‌سه‌ر داواكارییه‌كانی خه‌ڵكی ئه‌و شاره‌، به‌تایبه‌ت له‌بواری ئاوه‌دانكردنه‌وه‌دا.

ئه‌وه‌نده‌ی په‌یوه‌ندی به‌وه‌زاره‌تمانه‌وه‌ هه‌بێت، له‌ڕوی بونیادنانه‌وه‌ی ژێرخانی ڕۆشنبیری له‌وشاره‌دا، وه‌زاره‌تمان پرۆژه‌ی ڕێكخستنه‌وه‌و گه‌شه‌پێدانی هه‌یكه‌لی به‌ڕێوه‌به‌رایه‌تی گشتی ڕۆشنبیری و هونه‌ری پارێزگای هه‌ڵه‌بجه‌و ته‌واوی فه‌رمانگه‌كانی په‌یوه‌ست به‌وه‌زاره‌تمانه‌وه‌ وه‌ك پرۆژه‌ دراوه‌ته‌ سه‌رۆكایه‌تی په‌رله‌مان و ئه‌نجومه‌نی وه‌زیران به‌مه‌به‌ستی ته‌واوكردنی ڕێكاره‌ یاسایی و كارگێڕییه‌كانی.

له‌سی و چواره‌مین ساڵیادی كیمیابارانی هه‌ڵه‌بجه‌دا، سه‌ری ڕێزو نه‌وازش بۆ شه‌هیدانی ئه‌و شاره‌ داده‌نه‌وێنین.
هیواخوازین به‌هه‌وڵی هه‌موو لایه‌ك هه‌ڵه‌بجه‌ ئاوه‌دانتر ببێته‌وه‌و سیمای پارێزگابوون زیاتر له‌ڕوخساریدا بدره‌وشێته‌وه‌.

وه‌زاره‌تی ڕۆشنبیری و لاوان
2022/3/16
PUKmedia