قوباد تاڵەبانی پەیامێك بۆ ساڵیادی كیمیارانكردنی هەڵەبجە بڵاودەكاتەوە

قوباد تاڵەبانی رایگەیاند: لەمساڵدا هەرچی لەتواناماندا بێت كاردەكەین بۆ گەڕاندنەوەی روفاتی ئەو شەهیدانەی كە لە وڵاتی ئێرانن كە ئێسك و پروسكیان گەورەترین بەڵگەن لەسەر دڕندانەترین تاوانەكانی مێژوو. دەشڵێت: ئەمەشدا پێداچوونەوە دەكەین بەلیستی قەرەبووكردنەوەكاندا، بەتایبەتی ئەوانەی تا ئێستا زەویان وەرنەگرتووە، هەوڵی دابینكردنی زەویان بۆ دەدەین. 

قوباد تاڵەبانی بەبۆنەی ساڵیادی تاوانی كیمیابارانكردنی هەڵەبجە پەیامێكی بڵاوكردەوەو دەڵێت: لە یادی ٣٤ ساڵەی مەرگەساتی هەڵەبجەدا، سەری رێز و نەوازش بۆ شەهیدانی كیمیابارانی هەڵەبجە و كەسوكاری سەربەرزیان دادەنوێنێن، لەم یادەدا رایدەگەیەنین لەمساڵدا هەرچی لەتواناماندا بێت كاردەكەین بۆ گەڕاندنەوەی روفاتی ئەو شەهیدانەی كە لە وڵاتی ئێرانن، ئێسك و پروسكی ئەو ئازیزانەمان گەورەترین بەڵگەن لەسەر یەكێ لەدڕندانەترین تاوانەكانی مێژووی مرۆڤایەتی. 
راشیگەیاند: بەدواداچوونی تەواو دەكەین بۆ دۆسیەی منداڵە ونبووەكانی هەڵەبجەو هەوڵی دۆزینەوەو گەڕانەوەیان دەدەین بۆ ناو خێزان و كەسوكارەكانیان لەڕێی پشكنینی DNA، لەگەڵ ئەمەشدا پێداچوونەوە دەكەین بەلیستی قەرەبووكردنەوەكاندا، بەتایبەتی ئەوانەی تا ئێستا زەویان وەرنەگرتووە، هەوڵی دابینكردنی زەویان بۆ دەدەین. 
لەبەشێكی تری پەیامەكەیدا رایگەیاند: بەردەوامیش دەبین لەگفتوگۆكانمان لەگەڵ حكومەتی ناوەندی بۆ فشاری زیاتر لەپێناو قەرەبووكردنەوەی تەواوی كەسوكاری قوربانیانی هەڵەبجە، نوێنەرانی كوردیش لە بەغدا دەبێت ئەم پرسە بكەنە ئەولەوییەتی كاری خۆیان.
PUKmedia