په‌یامی سه‌رۆكی هه‌رێم له‌ یادی هه‌شتی مارسدا

یادی هه‌شتی مارس ڕۆژی جیهانیی ژنان، له‌ ته‌واوی ژنانی كوردستان له‌ وڵات و له‌ هه‌ر كوێیه‌كی جیهان بن، به‌ گه‌رمی پیرۆز ده‌كه‌م. هیوای به‌ره‌وپێشچوونی به‌رده‌وام و سه‌ركه‌وتنیان بۆ ده‌خوازم.

له‌م یاده‌دا وێڕای دووپاتكردنه‌وه‌ی هه‌موو پشتگیرییه‌كمان بۆ ژنان و كچانی كوردستان، دڵنیایان ده‌كه‌ینه‌وه‌ كه‌ وه‌ك هه‌میشه‌ داكۆكی له‌ ماف و ئازادییان ده‌كه‌ین و به‌ هه‌موو توانایه‌كمان، به‌رگرییان لێده‌كه‌ین.

له‌ كاتێكدا ئه‌م یاده‌ ده‌كه‌ینه‌وه‌، به‌ نیگه‌رانییه‌وه‌ له‌ ئاماری توندوتیژی و كوشتن و ئازاردانی ژنان و پێشێلكردنی مافه‌كانیان ده‌ڕوانین كه‌ كاریگه‌رییه‌كی نه‌رێنی كردووه‌ته‌ سه‌ر دۆخی كۆمه‌ڵایه‌تی و ناو و پێگه‌ی هه‌رێمی كوردستان. جه‌خت ده‌كه‌ینه‌وه‌ كه‌ ئه‌م دۆخه‌ به‌ هیچ شێوه‌یه‌ك قبووڵكراو نییه‌ و ده‌بێ به‌ ته‌واوی كۆتایی بێت.

به‌ره‌نگاربوونه‌وه‌ی توندوتیژی و ڕێگری له‌ كوشتنی ژنان به‌ هه‌ر پاساو و به‌هانه‌یه‌ك بێت، ئه‌ركێكی هاوبه‌شی هه‌موومانه‌‌ له‌ هه‌رسێ سه‌رۆكایه‌تییه‌كه‌ی هه‌رێمی كوردستان و لایه‌نه‌ په‌یوه‌نداره‌كانی حكومه‌ت و ڕێكخراوه‌كان و مامۆستایانی ئایینی و میدیا و كۆمه‌ڵگه‌ به‌گشتی.

هه‌روه‌ها له‌ ڕێی په‌روه‌رده‌ و ئاگایی و وشیاریی تاك و خێزانه‌وه‌، ‌ده‌بێ هه‌موومان هه‌ماهه‌نگ و هاوكار بین و هه‌وڵی جددی بده‌ین بۆ نه‌هێشتن و بنبڕكردنی توندوتیژی دژی ئافره‌تان و بره‌ودان به‌ كولتووری ناتوندوتیژی و لێبورده‌یی و یه‌كسانی و مسۆگه‌ركردنی به‌شداری و هاوبه‌شیی كارای ژنان تان له‌ هه‌موو جومگه‌ و كایه‌كانی ژیان و ده‌سه‌ڵات و سیاسه‌ت و كارگێڕیدا و به‌هێزكردنی تواناكانیان.

به‌رز و شكۆدار بێت یادی هه‌شتی مارس، سه‌ركه‌وتن بۆ خه‌بات و تێكۆشانی ئافره‌تان و ئازادیخوازان له‌پێناو دابینكردنی ماف و دادوه‌ری و یه‌كسانیدا. سڵاو له‌ گیانی قوربانیانی توندوتیژی دژی ژنان.


سه‌رۆكی هه‌رێمی كوردستان

PUKmedia