پەیامی مەكتەبی سیاسی یەكێتی بۆ رۆژی جیهانی ژنان

پەیامی مەكتەبی سیاسیی یەكێتیی نیشتمانیی كوردستان  بۆ ڕۆژی  8 مارس  رۆژی جیھانیی ژنان . 
بەبۆنەی رۆژی  ھەشتی مارس رۆژی  جیھانیی ژنانەوە  پیرۆزباییەكی گەرم لەكچان و ژنانی خۆڕاگری كوردستان دەكەین كە سەرەڕای لەمپەڕەكان و وێڕای تاوانەكانی ژن كوژان كە بەداخەوە بۆتە دیاردەیەكی بەدناو و  لەپێناو بەدیهێنانی مافەكانیاندا لەخەباتی ڕێكخراوەییان بەردەوامن .
لەم بۆنەیەدا بە پێویستی دەزانین وەبیر هەموو لایەكی بهێنینەوە كە یەكێتیی نیشتمانیی كوردستان هەر لەسەرەتای تێكۆشانی ھەمەلایەنییەوە و لە سۆنگەی بڕوابونی بەوەی ژنان بەشێكی دانەبڕاوی خەباتی سیاسیی و مەدەنیی پێشخستنی گشت كایەكانی ژیانی كۆمەڵی كوردستانن، زەمینەی رەوتی خەباتی ژنان و ئینجا پێكهێنانی یەكێتیی ژنانی كوردستانی رەخساند ، دوای  راپەڕینیش ژنان زیاتر تواناكانی خۆیان سەلماندو رێكخراوەكەشیان چالاكانەتر بووە  داكۆكیكەری مافەكانی ژنان هەر بۆیە سەرۆك مام جەلال-یش ھەمیشە پشتیوان و پارێزەری ماف و بەدیهێنەری خواستەكانیان بوە .ئەوەبو لەساڵی ٢٠٠٢ دا هەردوو بڕیاری ٥٩ و ٦٢ ی دەركرد كە یەكەمیان تایبەت بوو  بە مامەڵەكردنی بكوژانی ژن بە بیانوی شەرەف وەك تاوانبار تا  لە قانون  و دەستی  عەدالەت  قوتار نەبن ، ئەوی تریشیان رێگری كردن بوو لەفرە ژنی. جگەلەوانەش بواری زیاتر رەخسێنرا بۆ بەشداری ژنان لەناوەندەكانی بڕیارو چەندین دەزگای حكومی و مەدەنیشی بۆ داكۆكی و بەرزكردنەوەی ئاستی رۆڵی ژنان دامەزراند. 
سەرەڕای ئەوانە بەداخەوە ئێستا  ئاماری پێشێلكارییەكانی دژ بەژنان روو لە هەڵكشانە و ئاماژەكان ترسناك و مایەی شەرم ونەنگین. بۆیە  گشت هەوڵەكانمان زیاترچڕدەكەینەوە بۆ پارێزگاری لە مافەكانی ژنان وڕێگریكردن  لەوهەڕەشە وپێشلكارییانەی بەهەر پاساو بیانویەكەوە روبەڕویان دەبێتەوە.چونكە ئەو هەڕەشەو مەترسیانەی روبەڕوی ژنان دەبنەوە بەمەترسیی و دژایەتیی بۆسەر مرۆڤایەتیی و تەواوی  ناوەند و دامەزراوەكان  و كوردەواریی  دەزانین بۆیە چیتر ئەوانە لای ئێمە جێگەی قبوڵكردن نابێت. . 
لەكۆتاییدا بەرز وپیرۆز بێت ساڵیادی 8ی مارس  بەرەو چەسپاندنی زیاتری ھەمو  خواست و مافەكانی ژنانی كۆڵنەدەر و بەڵێنی داكۆكیكردنی  بەردەوام وشیلیگێرانەمان بۆ ژنانی كوردستان دووپات دەكەینەوە . 
 مەكتەبی سیاسیی
یەكێتیی نیشتمانیی كوردستان

PUKmedia