دكتۆر جوان ئیحسان داوای هه‌ڵوێستی په‌رله‌مان ده‌كات

دكتۆرجوان ئیحسان فوزی له‌په‌یامێپكدا ئاماژه‌ بۆ ئه‌وه‌ده‌كات، كاتی ئه‌وه‌ هاتووه‌ پسپۆڕان و كاربه‌ده‌ستان چاوێك به‌ (سیاسیه‌ی جینائی) دا بخشێنه‌وه‌، چونكه‌ دۆخه‌كه‌ به‌ره‌و مه‌ترسیه‌كی زۆر ده‌ڕوات .

ده‌قی په‌یامه‌كه‌ی...

هه‌واڵی له‌ده‌ستدانی شنیار خه‌مبارو دڵته‌نگی كردم ، به‌تایبه‌تی كه‌ به‌تاوانێكی قێزه‌ون و دڕندانه‌ گیانی له‌ده‌ستدا ، ئه‌م ڕوداوه‌ كۆستێكی تره‌ بۆ هه‌موولایه‌ك و شه‌رمه‌زارییه‌ بۆهه‌موو ئه‌ولایه‌نانه‌ی كه‌به‌كردار ڕێگه‌ له‌م تاوانانه‌ ناگرن و له‌سه‌رده‌مێكی وه‌ك ئه‌مڕۆدا كه‌له‌ساڵی (٢٠٢٢) داین و كه‌سانێكی دڕنده‌ ده‌ستیان ده‌چێته‌ خوێنی كه‌سانی بێ تاوان . داواكارم له پسپۆران به‌ (سیاسیه‌ی جینائی ) دا بچنه‌وه‌ و چاوێك به‌سزاكاندا بخشێننه‌وه، چونكه‌ ڕێژه‌ی تاوانكردن له‌كۆمه‌ڵگه‌ له‌به‌رزبوونه‌وه‌دایه‌و تاوانباران زۆر بێباكانه‌ و بێ سڵه‌مینه‌وه‌ ده‌ستیان داوه‌ته‌ تاوانكردن ، لێره‌وه‌ داوا له‌په‌ڕله‌مانی كوردستان ده‌كه‌م له‌ڕێگه‌ی فراكسیۆنه‌كانی ولیژنه‌ تایبه‌تییه‌كانییه‌وه‌ به‌دواداچوون بۆئه‌م جۆره‌ تاوانانه‌ بكه‌ن ، بارودۆخه‌كه‌ به‌ره‌و مه‌ترسییه‌كی زۆر ده‌ڕوات، به‌ڕێز جێگری سه‌رۆك وه‌زیران جه‌نابی كاك قوباد تاڵه‌بانی ڕۆڵێكی گرنگی بۆبه‌دواداچوون له‌م جۆره‌ كه‌یسانه‌دا هه‌یه‌ به‌ڵام پێویسته‌ هه‌موو ئه‌و كه‌سایه‌تی و لایه‌نانه‌ی كاریگه‌ریان له‌سه‌ر بڕیار هه‌یه‌ ڕۆڵێكی گرنگیان هه‌بێت و بێده‌نگ نه‌بن ، له‌به‌رئه‌وه‌  ئه‌م كێشانه‌ دووباره‌ ده‌بنه‌وه‌ و پێویسته‌ بنه‌بڕبكرێت ، لێره‌وه‌ پرسه‌و هاوخه‌میم ئاڕاسته‌ی كه‌س وكارو بنه‌ماڵه‌ی شنیار خان ده‌كه‌م له‌په‌روه‌ردگار داواكارم سه‌بوری و ئارامیان پێ ببه‌خشێت وهه‌رچی زووه‌ تاوانبار سزای یاسایی خۆی وه‌ربگرێت .

دكتۆر جوان ئیحسان فوزی 
ئه‌ندامی مه‌كته‌بی  سیاسی یه‌كێتیی نیشتمانیی كوردستان

PUKmedia تایبه‌ت