چەند زانیارییەكی سەرنجڕاكێش لەسەر توتی

چەند زانیارییەكی سەرنجڕاكێش لەسەر توتی
توتی یەكێكە لەو باڵندانەی پەیوەندییەكی كۆمەڵایەتیی بەهێزیان لەگەڵ مرۆڤدا هەیە. ئەمانەی خوارەوە چەند زانیارییەكی سەرنجڕاكێشن سەبارەت بەم زیندەوەرە:

زیاتر لە 370 جۆری هەیە لەجیهاندا.

زۆربەی توتییەكان لەناوچە ئیستیوائییەكاندا دەژین.

زیندەوەرێكی رەنگاوڕەنگەو دەنوكی چەماوەیەو قاچی بە هێزەو پێی چنگدارە.

بە یەكێك لەزیرەكترین جۆرەكانی باڵندە دادەنرێت.

هەندێك جۆر توتی (نەك هەمویان) دەتوانن لاسایی مرۆڤ بكەنەوە.

زۆربەی جۆرەكانی توتی لەسەر دانەوێڵە دەژین. ئەوانی تریش دەكرێ میوەو شیلەو گوڵ و مێرووی بچوك بخۆن.

هەموو جۆرەكانی توتی باونین بۆ بەخێوكردن وەك زیندەوەری ماڵی، بەڵكو هەندێكیان باون، بۆ نمونە كۆكتێل و باڵندەی خۆشەویستی.

هەندێك جۆر توتی هەیە كە زیاتر لە هەشتا ساڵ دەژی.

جۆرێك لەتوتی هەیە پێیدەووترێت كۆكاتۆ. توتیی پۆپنەداریشی پێدەووترێت. ئەمیش زیاتر لە بیست جۆری هەیە.

نیوزلەندا ماڵی هەندێك لەدەگمەنترین جۆرەكانی توتییە، یەكێك لەو جۆرانە كاكاپۆیە كە توتیی كوندەپەپوو و توتیی شەویشی پێدەووترێت. ئەم جۆرە قورسترین جۆری توتییەو ناتوانێت بفڕێت و بەشەودا چالاكەو لەسەر چەند جۆرێك دانەوێڵەو میوەو شیلەی رووەك دەژی.

یەك لەسەر سێی جۆرەكانی توتی مەترسیی قڕبونیان لەسەرە. یەكێك لەو جۆرانە كاكاپۆیە كە مەترسییەكی گەورەی قڕبونی لەسەرە لەجیهاندا. لەساڵی 2010 تەنها نزیكەی 130 توتیی لەم جۆرە بونی هەبووە.

ئاڵای دۆمینیكا كە وڵاتێكی بچوكەو دەكەوێتە كیشوەری ئەمەریكای باكورەوە، وێنەی توتییەكی لەسەرە.

سەرچاوە.. كتێبی زانیاریخانە/ چاپی 26هەم/ والی عەلی/ زانیاریی ژمارە

PUKmedia والی عەلی