له‌خوێندنگه‌یه‌كی شاره‌زوور 20 دووانه‌ هه‌یه‌

له‌قوتابخانه‌ی سه‌رده‌می بنه‌ڕه‌تی له‌قه‌زای شاره‌زوور زیاتر له‌ 20 خوێندكاری دوانه‌ی هەیە، ئه‌مه‌ش زۆربه‌ی كات گرفتی بۆ مامۆستایان و به‌ڕێوبه‌ری قوتابخانه‌كه‌ دروستكردوه‌.

له‌و باره‌یه‌شه‌وه‌ حه‌یده‌ر نیعمڵا به‌ڕێوه‌به‌ری خوێندنگه‌كه‌ به‌ PUKmedia ی راگه‌یاند: له‌ خوێندنگه‌كه‌مان ژماره‌یه‌ك خوێندكاری تێدایە كه‌ دوانه‌ن و زۆربه‌ی شێواز و هه‌ڵسوكه‌وتیان له‌یه‌ك ده‌چێت و ئه‌مه‌ش گرفتی بۆ مامۆستایان دروستكردوه‌.

 وتیشی: جاری واهه‌بووه‌و یه‌كێك له‌ قوتابییه‌كان هه‌ڵه‌یه‌كیان كردوه‌ كاتێك بانگمان كردوه‌ لێپرسینه‌وه‌ی له‌گه‌ڵ بكه‌ین، ده‌ڵێت من نیم خوشكه‌كه‌مه‌ یان براكه‌مه‌، بۆیه‌ زۆر توشی ئه‌و حاڵه‌ته‌ ده‌بین.

 ئه‌وه‌شی خسته‌ڕوو: باوك و دایكی منداڵه‌كان ئاماده‌نین له‌یه‌ك جیایان بكه‌ینه‌وه‌، به‌پێچه‌وانه‌وه‌ داوا ده‌كه‌ن له‌یه‌ك پۆل و له‌سه‌ر یه‌ك كورسی بن، كه‌ ئه‌مه‌ش جارێكی دیكه‌ گرفته‌كه‌ی بۆ ئێمه‌ زیادكردوه‌.

هه‌روه‌ها مونیره‌ كه‌مال مامۆستای عه‌ره‌بی له‌خوێندگه‌كه‌ به‌ PUKmedia ی راگه‌یاند: له‌كاتی به‌شداریكردنی خوێندكاران له‌بابه‌ته‌كان، ئه‌گه‌ر یه‌كێك له‌ دوانه‌كان هه‌ڵبستێنم ئه‌وه‌ی دیكه‌ هه‌ڵنه‌ستێنم بێتاقه‌ت ده‌بن و به‌ده‌موچاویانه‌وه‌ دیار ده‌بێت، بۆیه‌ ده‌بێت هه‌موو كات كه‌ یه‌كێك له‌دوانه‌كانت هه‌ڵسان بۆ سه‌ر ته‌خته‌ پاشان  ئه‌وه‌ی تریش هه‌ڵبسێنیت، كه‌ ئه‌مه‌ش یه‌كێكه‌ له‌ گرفته‌كانی دیكه‌ و ده‌بێت ئێمه‌ ره‌چاوی بكه‌ین.

PUKmedia محه‌مه‌د عه‌بدولره‌حمان/ شاره‌زوور